Գաֆեսճյան արվեստի կենտրոն
Գաֆեսճեան արվեստի կենտրոնը տեղեկացնում է, որ սեպտեմբերի 27-ին ժամը 21:00-ին տեղի կունենա լուսավառության հատուկ արարողությունՙ նվիրված կենտրոնի հիմնադիր, ազգային բարերար Ջերարդ Գաֆէսճեանի հիշատակին: Խորհրդանշորեն, լուսավառությունը կհաջորդի Գաֆեսճեան քանդակների պարտեզում կազմակերպվող «Կարին» համույթի հայկական ավանդական պարերի ուսուցման այս տարվա վերջին միջոցառմանը, որն արժանացել էր պարոն Գաֆեսճեանի հատուկ ուշադրությանը եւ անց էր կացվում նրա հովանավորությամբ:
Միջոցառումից անմիջապես հետո, ուղիղ ժամը 21:00-ին, Կասկադ համալիրի աստիճաններին տեղակայված մասնակիցները հատուկ ազդանշանի ներքո կվառեն նախապես տրամադրված լապտերներըՙ ի հիշատակ Ջերարդ Գաֆեսճեանի:
Գաֆեսճեան արվեստի կենտրոնը հրավիրում է բոլոր համաքաղաքացիներին մասնակցելու այս նվիրական արարողությանը եւ հարգանքի տուրք մատուցելու իրենց հայրենակցին:
Գաֆեսճեան արվեստի կենտրոնի (ԳԱԿ) առաքելությունն է ժամանակակից արվեստի լավագույն նմուշները ցուցադրել Հայաստանում եւ աշխարհին ներկայացնել հայկական մշակույթի լավագույնը: 2009 թվականի նոյեմբերին տեղի ունեցած բացումից առ այսօր Գաֆեսճեան արվեստի կենտրոնը, հավատարիմ իր առաքելությանը, կազմակերպում է բազմազան ցուցահանդեսներ, ներկայացնում ժամանակակից արվեստի յուրօրինակ գործեր, իրականացնում ֆիլմերի ցուցադրություններ, համերգաշարեր, դասախոսություններ եւ կրթական ծրագրեր:
