Տալլինում ընթացող ծանրամարտի Եվրոպայի երիտասարդական առաջնության հերթական օրը մրցահարթակ դուրս եկան մինչեւ 69 կգ քաշային ծանրորդները: Մինչեւ 20 տարեկանների մրցաշարում Հայաստանը ներկայացրին Վարդան Միլիտոսյանն ու Վլադիկ Կարապետյանը:
Մրցումներն ավելի հաջող սկսեց Վարդան Միլիտոսյանը, որը պոկում վարժությունում 130 կգ-ով արժանացավ փոքր բրոնզե մեդալի: Ճիշտ է, նա միայն 2-րդ մոտեցմամբ բարձրացրեց նախնական 125 կգ ծանրությունը: Վլադիկ Կարապետյանը բոլոր մոտեցումներն էլ հաջող կատարեցՙ հաջորդաբար բարձրացնելով 120, 125 եւ 127 կգ: Նա զբաղեցրեց 4-րդ տեղը: Այս վարժությունում հաղթող ճանաչվեց վրացի Շոթա Միշվելիձենՙ 143 կգ-ով արժանանալով ոսկե մեդալի: Արծաթե մեդալը նվաճեց ադրբեջանցի Էլխան Ալիգուլիզադանՙ 135 կգ:
Հրում վարժությունն ավելի հաջող կատարեց Վլադիկ Կարապետյանը: Առաջին մոտեցմամբ բարձրացնելով 153 կգ, Վլադիկը հաջորդ փորձի ժամանակ չկարողացավ իրեն ենթարկել 156 կգ-անոց ծանրաձողը, սակայն 3-րդ մոտեցմամբ գլխավերեւում պահեց 161 կգ ծանրությունը: Դա հնարավորություն տվեց հայ ծանրորդին հրում վարժությունում եւ երկամարտում (288 կգ) դառնալ բրոնզե մրցանակակիր: Վարդան Միլիտոսյանը երկամարտի 285 կգ (130+155) արդյունքով 12 մասնակիցների մեջ գրավեց 4-րդ տեղը: Նա հրում վարժությունում միայն մեկ հաջող մոտեցում կատարեցՙ բարձրացնելով 155 կգ:
Եվրոպայի չեմպիոնի տիտղոսը նվաճեց ադրբեջանցի Էլխան Ալիգուլիզադան, որը երկամարտում ցույց տվեց 309 կգ (135+174) արդյունք: Նրան ընդամենը 1 կգ զիջեց վրացի Շոթա Միշվելիձեն:
