Ծանրամարտի Եվրոպայի երիտասարդական առաջնությունում Հայաստանին հերթական բրոնզե մեդալը պարգեւեց մինչեւ 20 տարեկանների մրցաշարին մասնակցած Իզաբելա Յայլյանը: Մինչեւ 58 կգ քաշային աղջիկների մրցավեճը հայ մարզուհին սկսեց 82 կգ-ից: Այդ քաշը նա բարձրացրեց միայն 2-րդ մոտեցմամբ: 84 կգ-ը բարձրացնելու Իզաբելայի 3-րդ փորձն ապարդյուն անցավ: Պոկում վարժությունում նա 82 կգ-ով արժանացավ բրոնզե մեդալի: Լավագույն արդյունքը ցույց տվեց ռուսաստանցի Մարիա Լուբինանՙ 89 կգ: 2-րդ տեղը գրավեց ռումինուհի Պետրոնելա Հեգնիսըՙ 84 կգ:
Հրում վարժությունում Իզաբելան միայն առաջին մոտեցումը հաջող կատարեցՙ բարձրացնելով 100 կգ: Դա 4-րդ ցուցանիշն էր: Հայ մարզուհին երկամարտի 182 կգ (82+100) արդյունքով դարձավ բրոնզե մրցանակակիր:
Եվրոպայի չեմպիոնուհի հռչակվեց ռուսաստանցի Մարիա Լուբինան, որը երկամարտում ցույց տվեց 198 կգ (89+109) արդյունք: Նրան 10 կգ զիջեց ռումինուհի Պետրոնելա Հեգնիսը, որն արժանացավ արծաթե մեդալի:
