Աղասի Այվազյանին նվիրված երկրորդ փառատոնը կկայանա դժվարությամբ եւ հետաձգումներով:
Լեւոն Մութաֆյանը ցավով նշում է, որ հայ իրականության մեջ Աղասի Այվազյանի գրական ստեղծագործությունները շատ քիչ են լուսաբանվել:
Դեռեւս մի քանի տարի առաջ` գրողի մահվանից հետո, Աղասի Այվազյանի այրին` Գրետա Վերդյանը, նախաձեռնեց իրականացնել այվազյանական փառատոների շարք: Փառատոնի նպատակն է ձեւավորել դաշտ` Այվազյանի դրամատուրգիան ապրեցնելու, ինչպես նաեւ մեր ժամանակակից թատրոնում ձեւավորել Աղասի Այվազյանի թատերական խորան:
«Նախորդ փառատոնը տեղի է ունեցել երկու տարի առաջ, որն իր շուրջ համախմբեց ոչ միայն պրոֆեսիոնալ թատրոնները, այլեւ երիտասարդական, սիրողական թատրոնները: Սա այն եզակի փառատոներից է, որին պետական աջակցությունը ցավոք սրտի շատ քիչ է եւ դեռ չի հասել այն մակարդակի, որ հնարավոր լինի իրականացնել բոլոր ծրագրերն ու նախաձեռնությունները»,-ավելացրեց Լեւոն Մութաֆյանը:
Հատկանշական է, որ տիկին Գրետան դիմել է բազմաթիվ կազմակերպություննեի, պաշտոնյաների, կրոնական գործիչների` փառատոնին աջակցելու համար, սակայն անհրաժեշտ աջակցություն չեն ստացել: Ինչպես հավաստիացրեցին, այդ աջակցությունը շատ մեծ գումարների հետ կապված չէ:
Իսկ փառատոնի կազմակերպիչ Անի Փաշայանն իր հերթին ասաց, որ փառատոնը ֆինանսական խնդիրների պատճառով այս էլ երրորդ անգամ հետաձգվում է. «Մենք նախատեսել էինք հոկտեմբերի 3-ին անցկացնել, սակայն հետաձգվել է մինչեւ նոյեմբերի 11-ը: Սա ստեղծագործական աշխատանք է եւ հնարավոր է, որ դերասանական կոլեկտիվը նաեւ հիասթափության շրջան ապրի»:
