Թուրքիայում ընթացող մինչեւ 20 տարեկանների շախմատի աշխարհի առաջնության 4-րդ տուրում Վահե Բաղդասարյանն առաջին պարտությունը կրեց հնդիկ Սետուրամանի հետ պարտիայում: Վահեն 2,5 միավորով նահանջեց 36-րդ հորիզոնական: Իսկ ահա Սամվել Տեր-Սահակյանը հաղթեց Ջերի Մեզային եւ 2 միավորով ընթանում է 71-րդ հորիզոնականում:
Մրցաշարային աղյուսակը 4 միավորով միանձնյա գլխավորում է չինացի գրոսմայստեր Յույ Յունյին: Նա 4-րդ անընդմեջ հաղթանակը տոնեց Սալեհ Սալեմի հետ մրցավեճում: 8 շախմատիստներ 3,5-ական միավորով հետապնդում են առաջատարին:
Կանանց մրցաշարում Մարիա Գեւորգյանը ոչ-ոքի խաղաց բուլղարուհի Անի Կրումովայի հետ: Մարիան 2 միավորով 45-րդ տեղում է: 3,5-ական միավորով աղյուսակը գլխավորում են ռուսաստանցիներ Ալեքսանդրա Գորյաչկինան ու Ալինա Կաշլինսկայան, չինացի Մո Զաին, հնդիկ Մոնիշան, ինդոնեզացի Վարդա Մեդինան, ռումինացի Իրինա Բուլմագան եւ ղազախ Դինարա Սադվակասովան:
