ՌԴ իշխանությունները սկզբունքային որոշում են ընդունել Իրանին ընդառաջելու միանգամից երկու կարեւոր հարցերում: Մեկը վերաբերում է «C-300» ձեւափոխված զենիթահրթիռային համալիրների մատակարարմանը եւ Բուշեհրի աէկ-ի երկրորդ էներգաբլոկի կառուցմանը, տեղեկացնում է մոսկովյան «Կոմերսանտ» թերթը:
Մերձկրեմլյան մի աղբյուր թերթին հայտնել է, որ ՌԴ նախագահ Վլադիմիր Պուտինը կարգադրել է սկսել երկու գործարքների հետ կապված համաձայնագրերի մշակումը: Առաջինը կոչված է հարթելու հակաօդային պաշտպանության համակարգերի առնչությամբ Թեհրանի հետ ծագած վեճը. Իրանին C-300 BM «Антей-2500» զենիթահրթիռային համալիրների 5 դիվիզիոնի մատակարարման դիմաց (մոտ 800 մլն դոլար) Թեհրանը պետք է հետ կանչի նախորդ պայմանագրի ձախողման համար «Рособоронэкспорт»-ին իր ներկայացրած 4 մլրդ դոլարի հայցը:
Նախորդ տարբերակըՙ «Top-Ծ1ն» զենիթահրթիռային համալիրի մատակարարումը, Թեհրանին չէր գոհացրել: Նման փոխզիջման պատրաստակամություն վերջերս արտահայտել էր ՌԴ-ում Իրանի դեսպան Սեյեդ Մահմուդ Ռզա Սաջադինՙ ասելով, որ Իրանի իշխանությունները կկարողանային «հանդես բերել ճկունություն»:
Նույն աղբյուրը հայտարարել է, որ Իրանի հետ կապված երկրորդ նախագիծը Ռուսաստանի համար «տնտեսական առումով առանձնապես շահավետ չէ. այն ավելի շուտ քաղաքական է»: Մոսկվան պատրաստ է Թեհրանի հետ համաձայնագիր ստորագրել Բուշեհրի ատոմակայանի երկրորդ էներգաբլոկի կառուցման վերաբերյալ:
ՌԴ նախագահ Վլադիմիր Պուտինը մտադիր է երկու թեմաները Իրանի նախագահ Հասան Ռոուհանիի հետ քննարկել սեպտեմբերի 13-ին Բիշքեկում: Փորձագետները նշում են, որ Մոսկվա-Թեհրան մերձեցմանը զգալիորեն նպաստում է Սիրիայի հարցում նրանց համախոհությունը, ինչպես նաեւ ՌԴ-ԱՄՆ հակասությունների սրումը:
