Կլայպեդայում մեկնարկած ծանրամարտի մինչեւ 15 եւ մինչեւ 17 տարեկանների պատանիների Եվրոպայի առաջնությունում Հայաստանին առաջին մեդալը պարգեւեց Հրայր Հովհաննիսյանը: Մինչեւ 15 տարեկանների մրցավեճում Հրայրը 50 կգ քաշային կարգում պոկում վարժությունում բրոնզե մեդալ նվաճեցՙ բարձրացնելով 81 կգ: Ցավոք, նա հրում վարժությունում ընդամենը 95 կգ բարձրացրեց, որի հետեւանքով երկամարտի 176 կգ (81+95) արդյունքով 10 մասնակիցների մեջ գրավեց 6-րդ տեղը: Եվրոպայի չեմպիոն հռչակված ռումինացի Բոգդան Դումիտրասը երկամարտում ցույց տվեց 190 կգ (84+106) արդյունք:
Մինչեւ 17 տարեկան աղջիկների մրցավեճում 53 կգ քաշային կարգում հանդես եկած Հերմինե Եղիազարյանը 6 մասնակիցների մեջ երկամարտի 125 կգ (53+72) արդյունքով գրավեց 5-րդ տեղը: Մինչեւ 58 կգ քաշայինների մրցավեճում Ծովինար Կիրակոսյանը երկամարտի 141 կգ (62+79) արդյունքով 11 մասնակիցների մեջ հանգրվանեց 7-րդ հորիզոնականում:
