Շախմատի Հայաստանի առաջին խմբի առաջնության 7-րդ տուրում աղյուսակը գլխավորող Տիգրան Քոթանջյանն առաջին պարտությունը կրեց Գրիգոր Դիլանյանի հետ մրցավեճում: Չնայած անհաջողությանը, Քոթանջյանը 5,5 միավորով պահպանեց առաջատարի դիրքը: Նրան ընդհուպ մոտեցան Կարեն Գրիգորյանն ու Հովհաննես Գաբուզյանը, որոնք ընդամենը կես միավորով են զիջում Քոթանջյանին: Կարենը սեւերով հաղթեց Հովիկ Հայրապետյանին, իսկ Գաբուզյանը նույնպիսի խաղաքարերով առավելության հասավ Դավիթ Քալաշյանի նկատմամբ:
4-ական միավորով հաջորդ տեղերում են Հովիկ Հայրապետյանն ու Լեւոն Բաբուջյանը: Վերջինս պարտության մատնեց Տիգրան Հարությունյանին: Մանուել Պետրոսյանն էլ հաղթեց Արթուր Չիբուխչյանին: Տուրում արձանագրված միակ ոչ-ոքին գրանցվեց Հայկ Վարդանյանի եւ Վահե Բաղդասարյանի պարտիայում:
Մրցաշարում նախորդ տուրից պայքարից դուրս է եկել Գեւորգ Հարությունյանը: Այնպես որ բարձրագույն խմբի ուղեգրի համար պայքարը շարունակում են 13 շախմատիստներ:
