Ալ. Սպենդիարյանի տուն-թանգարանում «Եվրոպական ժառանգության օրերի» շրջանակում (օգոստոսի 31-սեպտեմբերի 1) կբացվի ցուցահանդես, որտեղ ներկայացված են թանգարանի արխիվում պահվող նոտաների անվանաէջերի եւ ազդագրերի լավագուն նմուշները: Դրանցից շատերը հրատարակված են համաշխարհային տպագրական մշակույթի մեջ մեծ դեր ունեցող հրատարակչատների կողմից` ներկայացնելով 19-րդ դարավերջի եւ 20-րդ դարասկզբի տպագրական մշակույթի գեղագիտական արժեքները: Առանձնանում են Մ. Բելյաեւի (Լայպցիգ), Պ. Յուրգենսոնի (Մոսկվա), Վ. Բեսսելի (Մոսկվա – Ս.Պետերբուրգ), Ա. Գուտխեյլի (Մոսկվա) եւ Մ. Բեռնարդի (Ս. Պետերբուրգ) երաժշտական հրատարակչատները: Դրանցից մի քանիսը շարունակում են իրենց գործունեությունը մինչ օրս: Այս տպագրատներում հրատարակվել են հռչակավոր կոմպոզիտորներ Բախի, Բեթհովենի, Սեն-Սանսի, Չայկովսկու, Գլինկայի, Գլազունովի, Սպենդիարյանի եւ այլոց գործերը:
Ցուցադրության գաղափարի եւ ձեւավորման հեղինակն է երիտասարդ նկարիչ-դիզայներ Լիլիթ Արշակյանը:
Ցուցադրության բացումըՙ 31. 08. 2013 ժամըՙ 13:00
Տուն-թանգարանի դահլիճում (մուտքն ազատ է)
