Պատանի հայ գրոսմայստեր Կարեն Գրիգորյանն Իսպանիայի Սիտգես քաղաքում անցկացված շախմատի մրցաշարում մեծ հաջողության հասավՙ նվաճելով գլխավոր մրցանակը եւ 850 եվրո դրամական պարգեւը: 39-րդ անգամ անցկացված ավանդական այս մրցաշարում առաջին անգամ հաղթող ճանաչվեց հայ շախմատիստը: Ավարտական տուրում Գրիգորյանը ոչ-ոքի խաղաց իր հիմնական մրցակից Ալեքսեյ Բարսովի հետ ու 9 հնարավորից վաստակեց 7,5 միավոր: Հաղթողի մյուս հավակնորդ Դանիել Պուլվետը հաշտություն կնքեց Խոսե Յնոջոսայի հետ ու 7 միավորով Բարսովի հետ բաժանեց 2-3-րդ տեղերը:
Կարեն Գրիգորյանը հիանալի անցկացրեց մրցաշարըՙ մնալով անպարտելի: Նա տոնեց 6 հաղթանակ, 3 պարտիա ավարտեց ոչ-ոքի: Հաջող հանդես եկան նաեւ Հայաստանի մյուս 2 ներկայացուցիչները: Կարեն Մովսիսյանը 6,5 միավորով գրավեց 5-րդ տեղը: Նա հաղթեց Ալեքսանդր Կովչանին: Հովիկ Հայրապետյանը 6 միավորով հանգրվանեց 11-րդ հորիզոնականում: 9-րդ տուրում նա պարտության մատնեց Ֆելիպե Գալեգոյին:
