Կառավարությունը երեկ հաստատեց բազմագործառնական ՀԴՄ-ների կտրոններով վիճակահանության կազմակերպման, անցկացման եւ պարգեւավճարների տրամադրման կարգը` ուժը կորցրած ճանաչելով իր նախկին որոշումը: Սահմանվեց, որ ամեն ամիս անցկացվող վիճակահանությանը հավասարապես մասնակցելու են նաեւ հարկ վճարողների կողմից 2013-ի հուլիսի 1-ից շահագործվող ՀԴՄ կտրոնների հատուկ համարները: Պարգեւավճար պետք է տրամադրվի հատուկ համարների առաջին նիշից սկսած հաջորդական հերթականությամբ վիճակահանության արդյունքում հայտնի դարձած 5 եւ ավելի նիշերին համընկնելու դեպքում: Ընդ որում, 8 եւ 7 նիշերի համընկնման դեպքում ս.թ. օգոստոսի 1-ից հետո յուրաքանչյուր վիճակահանության արդյունքում որպես պարգեւավճար կտրամադրվի 5 ավտոմեքենա, ինչպես նաեւ նախապես հայտարարված քանակով այլ գույք կամ իրավունք:
Այդուհանդերձ, մեկ անգամ եւս հարկ ենք համարում ընդգծել, որ ՀԴՄ կտրոններով վիճակահանության անցկացումը վերածվել է միջոցների անիմաստ փոշիացման եւ ոչ մի կերպ չի նպաստում դրանց նկատմամբ հանրային հսկողության իրականացմանը: Վաղուց արդեն ժամանակն է չեղյալ համարելու այդ միջոցառումը եւ ազատված միջոցներն ուղղելու որեւէ սոցիալական ծրագրի իրականացմանը:
