Մարդու իրավունքների պաշտպան Կարեն Անդրեասյանը երեկ է վերադարձել Ռուսաստանից, որտեղ, մի շարք հանդիպումներին զուգահեռ, հանդիպել է նաեւ Պոդոլսկում ավտովթարի պատճառ դարձած հայ վարորդ Հրաչյա Հարությունյանին: Օմբուդսմենի գնահատմամբՙ Հրաչյա Հարությունյանը դանդաղ է ապաքինվում, դեպրեսիոն վիճակից արդեն դուրս է եկել: «Նույնիսկ ժպտում էր, դրական թեմաներից էլ էինք զրուցում, ընտանիքի անդամներից», ասում է Անդրեասյանըՙ հավելելով, որ հայ վարորդը կամաց-կամաց ապաքինվում է:
Կարեն Անդրեասյանի պարզաբանմամբՙ Հրաչյա Հարությունյանը կարտահանձնվի եւ պատիժը կկրի հայրենիքում միայն դատավճռից հետո: «Դա է պարտադրում միջազգային պայմանագիրը», ասաց Անդրեասյանըՙ հավելելով , որ Հարությունյանը երեք փաստաբան ունի, եւ փաստաբանական թիմը կգլխավորի Ռուսաստանում ամենահայտնի փաստաբաններից մեկըՙ Ռուբեն Մարգարյանը: «Ռուսաստանի հայերի միության նախագահ Արա Աբրահամյանը խոստացել է ապահովել ֆինանսական կողմն, ու նա կառաջնորդի Հարությունյանի փաստաբանական թիմը, եւ մենք համոզված ենք, որ կապահովվի նրա պաշտպանությունը»:
Ըստ Անդրեասյանիՙ վտանգավոր է խնդիրը ներկայացնել որպես ազգամիջյան կոնֆլիկտ, սակայն դա չի արգելում, որ հարցը բարձրացվի, երբ խախտվում են մարդու իրավունքներն ու արժանապատվությունը:
Անդրադառնալով միջքաղաքային տրանսպորտի գնի թանկացմանըՙ Կարեն Անդրեասյանն ասաց, որ արդեն համապատասխան գրություն են ուղարկել քաղաքապետարան եւ սպասում են պարզաբանումների: «Այս պահին կարող եմ մեկնաբանել միայն մեկ հանգամանք: Ինձ համար տարակուսելի է, որ ընդամենը 3-4 ամիս առաջ քաղաքապետը խոստանում էր, որ թանկացում չի լինելու: Ինձ համար հետաքրքրական է, եւ եսՙ որպես օմբուդսմեն, որպես պաշտոնյա, որպես մարդ, ակնկալում եմ լսել նաեւ այդ հիմնավորումները, որ ինձ քաղաքապետարանն ուղարկելու է. ի՞նչն է փոխվել այս չորս ամիսների ընթացքում, որ այդպես կտրուկ քաղաքապետի ակնկալիքները փոխվել են եւ փոխվել են տնտեսական հիմնավորումն ու բազան», ասաց օմբուդսմենըՙ խոստովանելով, որ հիանում է այն քաղաքացիներով, ովքեր իրենց մեքենաներով անվճար մարդկանց են տեղափոխում: «Ես չունեմ իմ սեփական մեքենան, թե չէ ինքս հաճույքով որեւէ տեղից մեկնելովՙ ինձ հետ մարդկանց կտանեի», ասաց Անդրեասյանըՙ հավելելով, որ նախընտրում է ոտքով քայլել, քան 150 դրամ վճարել:
