Վերջին շրջանում Վաշինգտոնով, Մոսկվայով, Բրյուսելով եւ Ստամբուլով անցած եւ Հայաստանի հինգ մարզով շրջագայած «Ժառանգության» առաջնորդ Րաֆֆի Հովհաննիսյանը եզրակացրել է, որ Հայաստանի վիճակը կործանիչ է, այդպես չի կարելի շարունակել: Ու առաջարկում է ընդդիմադիր եւ իշխանական քաղաքական ուժերին, իսկ ավելի ստույգ` պահի գիտակցումն ունեցողներին, նստել մի սեղանի (հատկապես կլոր սեղանի) շուրջը, համազգային քննարկմամբ վերլուծել վիճակը, իսկ ահա արդեն սեպտեմբերի 21-ին պատրաստ լինել միասին հեղափոխություն անելու եւ դուրս գալու իրավիճակից: Այս իրավիճակով շարունակելու անհնարինության մի շարք բաղկացուցիչներ թվելով` պետականությունը կործանման ցուցիչ որպես (գազի ու տրանսպորտի թանկացումից սկսած մինչեւ արտագաղթ եւ Ռուսատանում մեր հայրենակից վարորդի նվաստացում), «Ժառանգության» առաջնորդը փրկարար «կլոր սեղանն» անհրաժեշտություն է համարում, արտահերթ լուծումները` հասունացած, իսկ քաղաքական ուժերն ու նախաձեռնությունները պետք է այս երկար վերանայումներից, վերլուծական հայեցողությունից դուրս գան ու մասնակից դառնան իր առաջարկին: Սակայն ամբողջ խնդիրն է, որ իր ասածների վերաբերյալ պետք է հասարակական պահանջ լինի, իսկ այդ պահանջը եթե չհասունանա, արդեն ինքըՙ Րաֆֆի Հովհաննիսյանը այդպիսի հանրային առաջարկ կանի: Իսկ թե ի՞նչ է հանրային առաջարկը, դա հավանաբար միայն Ռ. Հովհաննիսյանը կարող է իմանալ: Ու հավանաբար` դա կվերաբերի համազգային հեղափոխությանը, քանի որ այս կապակցությունը նա մի քանի անգամ գործածեց, ինչպեսՙ ի դեպ, «համազգային» բառի այլ կապակցություններ (օրինակ` համազգային կամ համապետական աշուն):
Հետաքրքրական է, որ իր հրավիրելիք «կլոր սեղանին» Ր. Հովհաննիսյանը սպասում է, իր խոսքով, «իշխանությունը զավթած կուսակցությանը»` ՀՀԿ-ին, ու պատրաստ է նրա հետ հանուն երկրի ապագայի բանակցություններ սկսել: Անգամ Ր. Հովհաննիսյանը պատրաստ է բանակցել ՀՀԿ առաջնորդ Սերժ Սարգսյանի հետ. ինչպես ասում են` իրադարձությունները կրկնվելու սովորույթ ունեն: Դե իսկ այդ առաջարկվող «կլոր սեղանին» պետք է քննարկվի ամեն ինչ` սոցիալական վիճակ, երկրից դուրս հայերի վիճակ, գազի գին, տրանսպորտի գին… որ հետո համազգային հեղափոխություն անեն:
«Ազգը» հետաքրքրվեց` արդյոք Ր. Հովհաննիսյանը վերլուծել եւ ընդունե՞լ է իր սխալները նախագահական ընտրություններին եւ դրանից հետո ծավալվող իրադարձությունների ընթացքում. «Սխալները բոլորինն են, իսկ սխալներն ընդունողն առաջին հերթին ես եմ: Իմ սխալը եղել է այն, որ առաջին հերթին իմ սխալն եմ ընդունում, իմ սխալները ամբողջական սխալներ են»: Իսկ ահա երեկվա ասուլիսի առաջին մասում Ր. Հովհաննիսյանը ապրիլի 9-ին տեղի ունեցած դեպքերի մասին ասել էր. «Ըստ ամենայնի, այստեղ կա նաեւ իմ մեղքը, քանի որ ես շատ ինքնավստահ էի ինձ պահում: Միաժամանակ, մարդկանց մեծ մասը, որոնք փետրվարի 18-ին քվեարկեցին իմ օգտին, ապրիլի 9-ին նստել էին իրենց տներում եւ իրադարձություններին հետեւում էին օնլայնՙ սպասելով երկրում այսրոպեական փոփոխությունների»:
