Եգիպտական «Ալ Յոում աս Սաբաա» թերթը հաղորդում է, որ նախագահ Մուհամմեդ Մուրսիի տապալումից հետո իսլամիստները երկու անգամ մահափորձ են կատարել պաշտպանության նախարար, գեներալ Աբդել-Ֆաթահ աս Սիսիի դեմ:
Առաջին մահափորձը կատարվել է անցյալ շաբաթ Էլ Արիշայի օդանավակայանում (Սինայի թերակղզու հյուսիս), ուր գաղտնի այցով պետք է ժամաներ աս Սիսին: Իսլամիստ գրոհայինները գնդակոծել են C-130 օդանավըՙ ենթադրելով, թե պաշտպանության նախարարն այնտեղ է: Սակայն այդ օդանավում կային միայն եգիպտական բանակի զինծառայողներ:
Երկրորդ մահափորձը ձեռնարկվել է երկուշաբթի օրըՙ հուլիսի 15-ին, երբ աս Սիսին պետք է նախագահական պալատ ժամաներ նախագահի պաշտոնակատար Ադլի Մանսուրի հետ խորհրդակցելու: Մի բարձրաստիճան պաշտոնյա հիշյալ թերթի խմբագրությանը հայտնել է, որ մահափորձը եղել է անհաջող, չնայած գրոհայինները հանրապետական պահակազորի համազգեստ էին հագել եւ զինված էին արդիական զենքով:
Պաշտոնյան վստահ է, որ երկու մահափորձերն էլ կազմակերպել է «Մահմեդական եղբայրներ» շարժումը:
Հրապարակման մեջ նաեւ ենթադրություն է արվում, թե մի քանի օր առաջ Սուեզ քաղաքի մոտակայքում կալանված «Գրադ» հրթիռները նախատեսված են եղել կառավարական հիմնարկների, մասնավորապես պաշտպանության նախարարության, գնդակոծումների համար:
Պաշտոնյան հայտնել է, որ չնայած մահափորձերինՙ գեներալ աս Սիսին սեփական անվտանգության ապահովման արտակարգ միջոցներ չի ձեռնարկում, շարունակում է ամեն առավոտ վազել եւ սպորտով զբաղվել, պահպանելով եգիպտական բանակի մարտական ոգին:
