Կազանում ավարտված համաշխարհային ուսանողական 27-րդ խաղերում Հայաստանի մարզական պատվիրակությունը մրցումներին մասնակցած 162 երկրների մեջ թիմային ընդհանուր հաշվարկով զբաղեցրել է 32-րդ տեղը, իսկ մեդալների քանակովՙ 28-րդ հորիզոնականը:
Հայաստանցի մարզիկները Կազանում նվաճեցին 10 մեդալՙ 1 ոսկե, 5 արծաթե, 4 բրոնզե: Ինչպես հայտնի է, մեդալների հաշվարկը կատարվում է ոսկե պարգեւների թվով: Այդ ցուցանիշով Հայաստանը զբաղեցրեց 32-րդ տեղը: Միակ ոսկե մեդալը Հայաստանին պարգեւեց սամբիստ Տիգրան Կիրակոսյանը:
Կազանում Հայաստանից մրցասպարեզ դուրս եկան 42 մարզիկներ, որոնք մասնակցեցին 10 մարզաձեւերի մրցումներումՙ հունահռոմեական եւ ազատ ոճի ըմբշամարտ, գոտիներով ըմբշամարտ, բռնցքամարտ, շախմատ, սամբո, ձյուդո, ծանրամարտ, լող եւ թեթեւ ատլետիկա:
Ուսանողական խաղերում նվաճած 10 մեդալներն իրենց օգտին գրանցեցին 4 մարզաձեւերի ներկայացուցիչները: Մեր ըմբիշներն արժանացան 3 արծաթե եւ 1 բրոնզե մեդալի, սամբիստները նվաճեցին 1 ոսկե եւ 2 բրոնզե մեդալ, մեկական արծաթե եւ բրոնզե մեդալ նվաճեցին բռնցքամարտիկները, մեկ արծաթե մեդալ էլ Հայաստանի մարզական պատվիրակությանը պարգեւեց շախմատիստ Զավեն Անդրեասյանը:
Ունիվերսիադան անցավ Ռուսաստանի ուսանող մարզիկների բացահայտ առավելությամբ, որոնք ընդհանուր առմամբ նվաճեցին խաղարկված 1165 մեդալներից 292-ը (155 ոսկե, 75 արծաթե, 62 բրոնզե): 2-րդ ցուցանիշն ունեցող ճապոնացիների ավարն ընդամենը 84 մեդալ էր (24+28+32):
Ադրբեջանը մեդալների հաշվարկում գրավեց 15-րդ տեղըՙ նվաճելով 16 մեդալ (4+5+7): Վրացիները նվաճեցին ընդամենը 3 մեդալ (1 արծաթե, 2 բրոնզե) ու գրավեցին 48-րդ տեղը:
