Փոթիում ընթացող Նանա Ալեքսանդրիայի գավաթի խաղարկության B խմբի մրցաշարի առաջատար Մամիկոն Մարտիրոսյանի համար անհաջող դասավորվեց 6-րդ տուրը: 5 անընդմեջ հաղթանակներից հետո նա առաջին պարտությունը կրեց իր հետ աղյուսակը գլխավորած Սուլխան Սիրբիլաձեի հետ պարտիայում: Վերջինս միանձնյա ստանձնեց առաջատարի դերը, իսկ Մամիկոնը 5 միավորով նահանջեց 3-րդ հորիզոնական:
Այս մրցաշարում հանդես եկող հայ շախմատիստներից 4 միավոր ունի Գոռ Ավետիսյանը, 3,5-ական միավոր են վաստակել Արմեն Նազարյանը, Արմեն Հարությունյանն ու Էդմոնդ Խաչատրյանը:
A խմբի մրցաշարում Գեւորգ Հարությունյանը հաղթելով Իվերի Չիխլաձեին, 5 միավորով Լեւան Պանցուլայայի եւ Լուկա Պայչաձեի հետ գլխավորեց աղյուսակը: 4,5 միավորով 5-րդ տեղում ընթացող Լեւոն Բաբուջյանը պարտության մատնեց Մուրադ Նուրիին: 4-ական միավոր ունեն Սեդրակ Մաթեւոսյանն ու Դավիթ Քալաշյանը:
Մինչեւ 12 տարեկան տղաների մրցաշարում մեր պատանիներից լավագույն արդյունքն ունի Արտաշես Առաքելյանը, որը հաղթելով Նիկոլոզ Կվարացխելիային, վաստակեց 4,5 միավոր: Արտաշեսը կես միավոր է զիջում Մատե Թոդաշվիլուն:
Մինչեւ 10 տարեկան տղաների մրցաշարում հայերից լավագույն արդյունքն ունի Արմեն Գրիգորյանըՙ 4 միավոր: Այստեղ առաջատարներն են 5,5 միավոր վաստակած Նիկոլոզ Կաչարավան եւ Մանի Ջահեդին: Մինչեւ 8 տարեկան տղաների մրցավեճում Հայկ Գրիգորյանը 6 հնարավորից 2,5 միավոր է վաստակել: Առաջատարներն են 5-ական միավոր ունեցող Գեորգի Ջիքիան, Ջաբա Ադամիան եւ Գեորգի Խաթաշվիլին:
