«Ռոյթըրզ» գործակալության լրագրող Լեյլա Բասամի փոխանցմամբ, հունիսի 30-ին նախատեսված Բաալբեկի ավանդական երաժշտական փառատոնը, հիմնված 1956-ին այդ ժամանակվա Լիբանանի նախագահ Կամիլ Շամունի կողմից, չի կարող տեղի ունենալ սիրիական պատերազմական վիճակի բեյրության արձագանքների պատճառով: Հռոմեական շինություններով հայտնի Բեքաայի հովիտը, որտեղ սովորաբար անցկացվում է փառատոնը, ռմբակոծվում է: Բաալբեկը լիբանանյան շիաների ռազմական խմբավորմանՙ Հեզբոլլահի պատվարն է համարվում, եւ որովհետեւ Հեզբոլլահը պաշտպանում է նախագահ Բաշար Ասադին, ապա սիրիական ապստամբների թիրախն է դարձել, եւ ըստ միջազգային այդ փառատոնի կազմկոմիտեի նախագահ Նայլա դե Ֆրեյջի փառատոնի անցկացումըՙ «անկարելի է»:
Բայց դա չի նշանակում, որ ընդհանրապես փառատոնը տեղի չի ունենալու: Կազմակերպիչները առայժմ օգոստոսի 9-ին են նախատեսում իրականացնել հանդիսությունը, բայց մեկ ուրիշ վայրում, որը դեռ չի հստակեցված: Փառատոնի անցկացումը կասեցվել էր նաեւ Լիբանանի 15 տարվա քաղաքացիական պատերազմի ընթացքում (որն ավարտվեց 1990-ին), եւ 2006 թվին Հեզբոլլահի եւ Իսրայելի միջեւ ծագած պատերազմի օրերին:
Սովորաբար Բաալբեկի երաժշտական փառատոնը զբոսաշրջիկների մեծ խմբեր է բերում Լիբանան, հատկապես Ծոցի երկրներից: Սակայն մեկ այլՙ Բեյթ-էդ-դինի փառատոնի տնօրենի հավաստիացումներով վերջին տարիներին մոտ 15 տոկոսով նվազել է զբոսաշրջությունը եւ փառատոների մասնակիցների թվաքանակը:
«Այդուհանդերձ, մենք պարտավոր ենք շարունակել ավանդույթը եւ ցույց տալ աշխարհին մեր երկրի մշակութային կողմը», նշել է նա:
