Աշխարհահռչակ ռեժիսոր-կինովավերագրող Արտավազդ Փելեշյանն այսուհետեւ կկրի նաեւ իր ծննդավայր Գյումրու պատվավոր քաղաքացու կոչումը: Նման որոշում համայնքային ավագանին միաձայն կայացրել էր այս տարվա դեռ ապրիլի 16-ին, վարպետի ծննդյան 75-ամյակի առթիվ, իսկ այդ պատվավոր կոչման հավաստագիրը նրան հանդիսավոր հանձնվեց հուլիսի 17-ի երեկոյան, Վարդան Աճեմյանի անվան դրամատիկական թատրոնի դահլիճում: Այդ օրն իր ընտանիքի անդամների` կնոջ, քրոջ եւ թոռնուհիների հետ հայրենի քաղաք այցելած արվեստագետը մինչ այդ եղել էր Գյումրու քաղաքապետարանում, ջերմ մթնոլորտում հանդիպել քաղաքապետի, աշխատակազմի եւ ավագանու անդամների հետ:
Թատրոնի դահլիճում կայացած հանդիսության ժամանակ Փելեշյանին հանձնվել են նաեւ նոր ծննդական, Գյումրու ավանդական կենցաղի խորհրդանիշ կլկլան բաժակ` «մուշուրբա», եւ նոր լույս տեսած «Գյումրի» եռալեզու գիրք-ալբոմը:
