ՌԴ ֆուտբոլի նախորդ առաջնության լավագույն ռմբարկուներից մեկըՙ Յուրա Մովսիսյանը նոր մրցաշրջանի մեկնարկային խաղում բացեց գոլերի հաշիվը: Սամարայում «Կռիլյա Սովետովի» հետ խաղի 21-րդ րոպեին նա հստակ իրացրեց 11 մ հարվածը: Այդ գոլն էլ 2-0 հաշվով հաղթանակ պարգեւեց «Սպարտակին»:
Խաղից հետո Յուրա Մովսիսյանն իր տպավորություններն է կիսել «Սպորտ-Էքսպրեսի» թղթակցի հետ զրույցում. «Դուք հասկանում եք, որ այժմ կարեւոր է միայն արդյունքը, որին մենք այսօր հասանք: Հարցնում եք, թե ես գո՞հ եմ, թե ինչպես էին թիմակիցներս ինձ գնդակ մատակարարում: Դա սխալ հարցադրում է: Մենք բոլորս ընդհանուր գործ ենք կատարում: Շնորհակալ եմ տղաներին, որոնց շնորհիվ կարողացա գոլ խփել»:
Ի դեպ, խաղից առաջ ԱՄՆ-ում բնակվող հայ երկրպագուներից մեկը «Կնքահոր» դիմանկարով մարզաշապիկով եկել է հյուրանոց եւ Մովսիսյանին նվիրել 25-ամյա ֆուտբոլիստի լուսանկարով ու THE DON մակագրությամբ նմանատիպ մարզաշապիկ: Յուրան շնորհակալություն է հայտնել եւ նշել է, որ նման պատվի արժանացողը պետք է յուրաքանչյուր խաղում գոլի հեղինակ դառնա:
