Անկարգապահներըՙ մինչեւ 200 տոկոս մալուս, ԱՊՊԱ բոնուս-մալուս նոր համակարգով
Բոնուս-մալուս համակարգը Հայաստանում գործում է այս տարվա հունվարի 1-ից, բայց միայն բոնուսների մասով: ԱՊՊԱ պատահարներ չունեցած վարորդների 75 տոկոսը ստացել է բոնուս` ապահովագրավճարի 3 տոկոսի չափով: Դա ընդհանուր առմամբ կազմել է 350 մլն դրամ: Այս ցուցանիշների մասին երեկ խոսեց Հայաստանի ավտոապահովագրողների բյուրոյի տնօրեն Աննա Վարդիկյանը ՙ ներկայացնելով Հայաստանի Հանրապետությունում բոնուս-մալուս համակարգի ներդրման մանրամասները: Հիմնական նորությունն այն էր, որ արդեն 2014-ի հունվարի 1-ից գործելու են նաեւ մալուսները: Այսինքն, անկարգապահ` 2013-ի ընթացքում ԱՊՊԱ պատահարների պատճառ դարձած վարորդները կվճարեն հավելյալ գումար:
Աննա Վարդիկյանի տեղեկացմամբՙ այն բարեխիղճ վարորդները, որոնք 2013-ի հունվարի 1-ից մինչեւ ԱՊՊԱ պայմանագրի կնքումը 345 օրվա ընթացքում չեն ունենա իրենց մեղքով ԱՊՊԱ պատահար, կստանան բոնուսներ: Կարգապահ լինելու դեպքում յուրաքանչյուր տարի այդ բոնուսներն աճելու են, հասնելով առավելագույնի` մինչեւ 50 տոկոս բոնուսի: Ի՞նչ է դա նշանակում: Օրինակ` եթե ապահովագրավճարը կազմում է 35 հազար դրամ, ապա 5 տարի կարգապահ լինելու դեպքում այն կարող է զեղչվելՙ հասնելով 17500 դրամի:
Սակայն ոչ կարգապահ` ԱՊՊԱ պատահարում մեղավոր վարորդները կպատժվենՙ ստանալով մալուս: Առաջին պատահարի համար այն կկազմի 16 տոկոս: Այսինքն, այդքանով ավելի ապահովագրավճար կվճարվի հաջորդ տարի: Յուրաքանչյուր հաջորդ պատահարի դեպքում այդ գումարը կաճի: Ընդ որում, արդեն երրորդ պատահարից հետո կհասնի առավելագույնի` ապահովագրավճարի 200 տոկոսին: Անկարգապահ վարորդներին ներում կշնորհվի 4 տարի անընդմեջ կարգապահ լինելու եւ պատահար չունենալու դեպքում: Միայն այդ դեպքում նրանք նորից կանցնեն բազիսային ապահովագրավճարին: Նկատի ունենալով այս ամենըՙ Հայաստանի ավտոապահովագրողների բյուրոն վարորդներին կոչ է անում լինել կարգապահ:
Բյուրոյի տնօրենը նշեց, որ համակարգը կոչված է ապահովելու արդարություն, քանի որ տրամադրում է բոնուսներ կարգապահներին ի հաշիվ անկարգապահ վարորդների եւ մալուսներ` անկարգապահներին, խթանում է վարորդների կարգապահությանը, կանխում է ԱՊՊԱ ոլորտում խարդախությունները` կապված մեղավոր կողմի «փոփոխման» հետ:
«Ազգի» հարցին, թե ինչպե՞ս է գործելու բոնուս-մալուս համակարգը ավտոմեքենայի վաճառքի կամ անվանափոխման դեպքում, Աննա Վարդիկյանը պատասխանեց, որ համակարգը գործելու է միայն անձի անվան եւ պատմության հետ: Եթե նա մեքենան վաճառում է եւ գնում նոր մեքենա, ապա չի ազատվում մալուսից կամ չի զրկվում բոնուսից:
Մեր մյուս հարցին, թե համակարգի ներդրումը որքանո՞վ կնվազեցնի ճանապարհատրանսպորտային պատահարների թիվը եւ այսպես կոչված «ռիսկային» վարորդների թիվը, Հայաստանի ավտոապահովագրողների բյուրոյի տնօրենն ասաց, որ տվյալները նախնական են, համաձայն որոնց ակնկալվում է, որ ռիսկային վարորդների թիվը կնվազի 6-10 տոկոսով:
