Եվրոպայի լիգայի որակավորման 2-րդ փուլում Հայաստանի գավաթակիր «Փյունիկը» կմրցի Վիլնյուսի «Ժալգիրիսի» հետ: Վերջինս 2 խաղերի ընդհանուր արդյունքով առավելության է հասել Իռլանդիայի «Սենտ Պատրիկսի» նկատմամբ: Վիլնյուսում կայացած առաջին խաղում գրանցվել էր գոլառատ ոչ-ոքիՙ 2-2: Ընդ որում «Սենտ Պատրիկսը» հաշիվը հավասարեցրել էր խաղավարտից 3 րոպե առաջ:
Թվում էր, թե սեփական հարկի տակ իռլանդացիներին կհաջողվի դրական արդյունքի հասնել եւ հաջորդ փուլի ուղեգիր նվաճել: Սակայն «Ժալգիրիսը» խաղը շահեց 2-1 հաշվով: Հյուրերն արդեն 52-րդ րոպեին առջեւում էին 2-0 հաշվով: Միայն խաղավարտից 5 րոպե առաջ դաշտի տերերին հաջողվեց 11 մ հարվածով կրճատել հաշիվը:
«Փյունիկը» «Ժալգիրիսի» հետ առաջին հանդիպումը կանցկացնի Վիլնյուսում, հուլիսի 18-ին: Պատասխան խաղը կկայանա մեկ շաբաթ անց «Հանրապետականում»:
Եվրոգավաթներում «Ժալգիրիսի» հետ հայկական ակումբները մրցել են միայն մեկ անգամ: 1999/2000-ի մրցաշրջանում չեմպիոնների լիգայի որակավորման 1-ին փուլում «Ժալգիրիսը» սեփական հարկի տակ 2-0 հաշվով հաղթել է Արարատի «Ցեմենտին»: «Հրազդան» մարզադաշտում կայացած պատասխան խաղում էլ լիտվացիները 3 անպատասխան գնդակ են խփել: Հետաքրքրական է, որ «Ցեմենտի» կազմում 2 հանդիպումներին էլ մասնակցել է «Փյունիկի» ներկայիս գլխավոր մարզիչ Ռաֆայել Նազարյանը:
Հիշեցնենք, որ Գյումրիի «Շիրակը» Բելգրադի «Պարտիզանին» կհյուրընկալի հուլիսի 17-ին: Պատասխան հանդիպումը կկայանա մեկ շաբաթ անց Բելգրադում:
