Այս մասին երեկ հայտնեց էկոնոմիկայի նախարար Վահրամ Ավանեսյանը: Նա մասնավորապես նշեց, որ արդեն 10 գերատեսչություններ ներկայացրել են ռիսկի հիման վրա ստուգումներին անցնելու սկզբունքներն ու ստուգաթերթերը, իսկ մնացած 7-ն էլ դա կանեն մինչեւ սեպտեմբեր:
Պետական կրկեսի ներդրումային ծրագիրը երկարացվեց
Պետական գույքի կառավարման վարչության պետ Արման Սահակյանը երեկ կառավարության նիստում առաջարկեց երկարացնել «Պետկրկեսի» գնորդ ընկերության պայմանագրային պարտականությունների կատարման ժամկետը: Դա պայմանավորված էր նրանով, որ շենքի հիմնանորոգման համար կատարված գրեթե 108 մլն դրամ ներդրումից հետո պարզվել է, որ այն չի համապատասխանում սեյսմակայունության պահանջներին, ուստի որոշվել է շենքը քանդել ու նորը կառուցել: Եթե նախկինում կրկեսի ներդրումային ծրագիրը պետք է ավարտվեր մինչեւ 2014-ի վերջը, ապա կառավարության երեկվա որոշմամբ այդ ժամկետը երկարացվեց մեկ տարով` մինչեւ 2015-ի վերջը:
2 մլրդ դրամ ներդրումներով ջերմոցային տնտեսություն Կոտայքի մարզում
«Այլընտրանքային էներգիա» ՍՊԸ կողմից իրականացվող ներդրումային ծրագրով 2013-ի հուլիսի 20-ից մինչեւ դեկտեմբերի 1-ը ներառյալ ներմուծվող 300 մլն դրամը գերազանցող արժեքով ապրանքների ավելացված արժեքի հարկի (ԱԱՀ) վճարման ժամկետը կառավարությունը երեկ հետաձգեց մինչեւ 2016 թ. հուլիսի 20-ը: Այս ծրագրով Կոտայքի մարզում կառուցվող 5 հա ջերմոցային տնտեսության համար ընկերությունը նախատեսում է իրականացնել ավելի քան 2 մլրդ դրամի ներդրում: Դրա շնորհիվ կգործարկվեն հոլանդական արտադրության ժամանակակից սարքավորումներ, որոնցով նախատեսվում է տարեկան թողարկել շուրջ 1,4 մլրդ դրամի արտադրանք: Արտադրանքի գերակշիռ մասը կարտահանվի Ռուսաստանի Դաշնություն եւ Վրաստան: Ծրագրի իրագործմամբ կստեղծվի մոտ 100 աշխատատեղ` 80-90 հազ. դրամ միջին աշխատավարձով:
