Բեյրութի Էմիլ Լահուդի անվան հանդիսասրահում մայիսի 11-ին ՀԲԸՄ-ՀԵԸ «Արին» պարախմբի ունեցած փայլուն ելույթի մասին ներկայացնում է Մոնրեալի «Ապագայ» թերթըՙ Բեյրութից Համո Մոսկոֆյանի թղթակցությամբ:
Նույն օրերին «Ազգի» խմբագրությունը ստացել էր նաեւ պարային այս խմբի ելույթի գեղարվեստական հայտագիրը, որ նվիրված է վաղամեռիկ Արին Չերչյանի հիշատակին. նրա անունով խումբն է անվանակոչվել:
Այս տարեշրջանի խմբի հայտագիրը նվիրված է Արամ Խաչատրյանի ծննդյան 110-ամյակին: Ինչպես ներկայացված է, «Արին» պարախումբը պարարվեստի ներկա մակարդակին կարողացել է հասնել տեւական ու համբերատար խմբային աշխատանքի ու նվիրումի շնորհիվ: Բացի բուն մասնագիտական աշխատատար փորձերից պակաս կարեւոր չեն եղել նոր տարազների ձեւավորման եւ բեմադրության աշխատանքները:
«Արին» պարախմբի մայիսյան ոգեշունչ ելույթի առիթով խմբի գեղարվեստական ղեկավար եւ պարուսույց Գայանե Մածունյանը ներկայացնում է այն որպես հայկական հնամենի պարերից հյուսված գեղեցիկ մի պատմությունՙ արդիական շնչով նորոգված, որի մեջ անգնահատելի ավանդ է ունեցել հայտնի պարահավաք եւ ազգագրագետ Գագիկ Գինոսյանը` նրա բարձրակարգ եւ վարպետ աշխատանքը պարախմբի հետ: Ինչպես ներկայացված է հայտագրում, աշխատանքային 7 գերխիտ շաբաթների ընթացքում «Արինի» անդամները ոչ միայն ծանոթացել են կյանքի առօրյայից արդեն հեռացած ավանդական պարերին, այլեւ բախտ են ունեցել ձեռք բերելու նոր ուսուցիչ եւ ընկեր, որից շատ բան են սովորել, հատկապես հայ պարի իմաստային շերտերին, հայ ազգային մշակույթի հարստություններին վերաբերող:
Համերգ-ներկայացման առաջին մասում հանդիսականը հաճույք է ունեցել վայելելու հայ ազգագրական եւ ազգային հայտնի պարային կատարումներ: «Լեռներու կանչի» երկրորդ մասով պարախումբը հարգանքի տուրք է մատուցել Արամ Խաչատրյանինՙ կոմպոզիտորի ծննդյան 110-ամյակի առիթով ներկայացնելով պարային գեղեցիկ կոմպոզիցիաՙ Խաչատրյանի ստեղծագործությունների հիման վրա:
Համերգի ավարտին ՀԵԸ շրջանային վարչության ատենապետ Վիգեն Չերչյանը շնորհակալությամբ պարգեւատրել է պարուսույցներ Գագիկ Գինոսյանին եւ Գայանե Մածունյանին, նաեւ ՀԵԸ պարախմբի վարչության անդամներին:
«Կը յուսանք, որ «Արին» պարախմբի մէջ տիրող պրպտումի ալիքը բեմէն ոգեւորէ նաեւ մեր հանդիսատեսը, որպէսզի բոլորս ալ աւելի ուշադիր ըլլանք մեր ազգային ժառանգութեան հանդէպ եւ անցնելով մեր վերնագրային գիտելիքներու սահմանըՙ նախանձախնդիր ըլլանք հայ մշակոյթի եւ արուեստի աւելի խոր ուսումնասիրութեան եւ անոր աւելի գիտակից պահպանման», գրում է Գ. Մածունյանը:
Հայտագիր-բրոշյուրը ներառում է Արամ Խաչատրյանի եւ Գագիկ Գինոսյանի կենսագրական ակնարկներ, պարախմբի ելույթների մամուլի արձագանքների պատառիկներ, խմբի անդամների լուսանկարներ, ներկայացված է նաեւ հիշյալ ելույթի պարերի ցանկը:
