Տնտեսական հարցի լուծում, սոցիալական ոլորտի բարելավումներ: Սրանք իրանցի ժողովրդի ակնկալիքներն էին նախագահական ընտրություններից: Հենց դա է պատճառը, որ նախագահի թեկնածուները իրենց ծրագրերում առաջնահերթությունը տալիս էին սոցիալական խնդիրներին:
Իրանի Մեջլիսի հայազգի պատգամավոր Կարեն Խանլարյանի մեկնաբանությամբՙ Իրանում տնտեսական վիճակը շարունակում է մնալ ծայրահեղ վատ, որեւէ առաջընթաց նկատելի չէ: Իրանցի ժողովուրդը նոր, առավել բարեկեցիկ ապագայի հույսերը կապում է նոր կառավարության եւ նախագահի հետ, եւ հենց դա է պատճառը, որ նախագահական ընտրություններին արձանագրվեց 73 տոկոս մասնակցություն: Բնակչության 53 տոկոսն ընտրեց Հասան Ռոհանիին, որը համեմատաբար համարվում է բարեփոխումների կողմնակից քաղաքական գործիչ: Խանլարյանի խոսքերովՙ արտաքին քաղաքականության մեջ սուր եւ անկյունադարձային փոփոխություններ չեն լինի, սակայն, ի տարբերություն իր նախորդի, Ռոհանին առավել մեղմ ու դիվանագիտական հնարքներ կկիրառի Արեւմուտքի հետ բանակցությունների ժամանակ: Այս առնչությամբ արդեն որոշակի քայլեր ձեռնարկվում են. մասնավորապես երկրի դիվանագիտական կորպուսում սպասվում են լուրջ փոփոխություններ եւ կադրերի նորացում:
Նորարարություններին զուգահեռՙ Ռոհանին կարեւորելու է ազգային շահն, ու դրանք կմնան անփոփոխ: Անփոփոխ կլինի նաեւ Իրանի միջուկային ծրագրի իրականացումը: Թեպետ հենց ուրանի հարստացման ծրագրի պատճառով է, որ Արեւմուտքն Իրանին պատժել է, եւ երկիրը հայտնվել է տնտեսական բլոկադայի մեջ, այնուամենայնիվ, միջուկային ծրագիրը շուրջ 30 տարվա պատմություն ունի, եւ այս նախագահի դիրքորոշումն էլ այդ հարցում կմնա անփոփոխ:
Խանլարյանը հույս ունի, որ գոնե սնունդի հարցում նոր նախագահը եւ դիվանագետները կկարողանան «լեզու գտնել» Արեւմուտքի հետ:
Հայկական համայնքն էլ որոշակի ակնկալիքներ ունի նոր նախագահից: Նախագահական ընտրություններից առաջ հայ համայնքի ներկայացուցիչները հանդիպել են նախագահի թեկնածուների հետ եւ նրանց ներկայացրել համայնքի պահանջները: Հայ համայնքի գլխավոր պահանջը Հայոց ցեղասպանության ճանաչումն է: Նրանք ցանկանում են, որ նախագահը ազգային եւ կրոնական փոքրամասնությունների գծով մասնագետ խորհրդական ունենա, որպեսզի նրա միջոցով կառավարությունը տեղյակ լինի իր երկրի ազգային փոքրամասնությունների խնդիրներին:
Հայազգի պատգամավորը շեշտում է, որ բոլոր թեկնածուները դրական են արտահայտվել եւ նկատի ունեցել հայկական կողմի առաջարկությունները:
Խանլարյանը համոզված է, որ երդմնակալությունից հետո նորընտիր նախագահը կհանդիպի հայ համայքնի ներկայացուցիչների հետ, այդպես եղել է բոլոր նախորդ նախագահների օրոք: «Այդ ժամանակ առավել մանրամասն կներկայացնենք Հայոց ցեղասպանության հետ կապված մեր առաջարկություններն ու հույս պետք է փայփայենք, որ հաջորդ տարվա ապրիլի 24-ին Ռոհանին գոնե դատապարտող հայտարարությամբ հանդես կգա», ասաց պատգամավորը:
