Ըստ Մարդու իրավունքների եվրոպական դատարանում Հայաստանի ներկայացուցիչ Ալվինա Գյուլումյանի ` այս պահին Եվրոպական դատարանում չքննված 873 դիմում կա ընդդեմ Հայաստանի Հանրապետության, որից մոտ 500-ը Ադրբեջանի քաղաքացիների դիմումներն են Ղարաբաղյան հակամարտության գոտուց ընդդեմ մեր երկրի: Իսկ Հայաստանի քաղաքացիների դիմումները հիմնականում վերաբերում են արդար դատաքննության իրավունքին, բավարար չպատճառաբանված նախնական կալանքի որոշումներին (վերջիններիս դեպքում ըստ այդ դիմումների հաշվի չեն առնված գործերի առանձնահատկությունները, չի քննարկվել այլ խափանման միջոցի կիրառման հարցը): Կան նաեւ դիմումներ, որոնք վերաբերում են սեփականության օտարման խնդիրներին:
Հայաստանից դիմումների` ժամանակային առումով երկար քննությունը պայմանավորված է գործերի մեծ քանակով, բացի դրանից` գրագրությունը կողմ պետությունների մեջ կարող է ամիսներ տեւել: Ամենալավատեսական սցենարի դեպքում անգամ` մեկ տարուց շուտ Եվրոպական դատարանում դիմում չի կարող քննվել, եթե դա ակնհայտ անհիմն դիմում չէ: Առաջնահերթություն է տրվում անձի կյանքի, անձի արժանապատվության դեմ ուղղված գործերի վերաբերյալ խախտումներին, հաշվի է առնվում դիմողի տարիքային եւ առողջական ցենզը:
Ա. Գյուլումյանի գնահատականով` Հայաստանը տարածաշրջանային առումով ԵԴ-ի մեծաթիվ գործերի մատակարարների թվում չէ:
