Բնապահպանության փոխնախարար Սիմոն Պապյանը երեկ տեղի ունեցած մամուլի ասուլիսի ժամանակ անդրադարձավ Վերահսկիչ պալատի (ՎՊ) մի քանի առաջարկներին, որոնք առնչվում էին վտանգավոր թափոնների կառավարմանը: Առաջին առաջարկն այն էր, որ պետք է հստակեցվեն թափոնների «տեղադրում» եւ «պահում» հասկացությունները, ինչի վերաբերյալ Սիմոն Պապյանը հայտնեց, որ այդ հասկացությունները հստակ սահմանված են: «Տեղադրում» նշանակում է մեկուսացում, ինչը բացառում է թափոնների հետագա օգտագործումը, իսկ «պահում» նշանակում է ժամանակավորապես աղբի պահպանում` հետագայում դրա հեռացման համար:
Հաջորդ առաջարկը վերաբերում էր վտանգավոր թափոնների բնապահպանական վճարներին, որպեսզի կիրառվեն նոր դրույքաչափեր: Սիմոն Պապյանը համաձայնեց այս առաջարկին եւ տեղեկացրեց, որ նախարարությունն իր առաջարկությունները ներկայացրել է այս հարցի առնչությամբ: Նա նաեւ հայտնեց, որ վտանգավոր է համարվում արտադրական եւ շինարարական աղբը, իսկ չտեսակավորված կենցաղային աղբը համարվում է 4-րդ դասի վտանգավոր: Ըստ փոխնախարարի, պետք է հստակեցվեն, թե ովքե՞ր են համարվում բնապահպանական վճար վճարողներ: Դրա համար նրանք պետք է ունենան համապատասխան լիցենզիաներ: Ներկայումս 64 մլն դրամ բնահպանական վճարներից շատ քիչ մասն են կազմում կենցաղային աղբ տեղադրողները:
Նուբարաշենի աղբավայրի վերաբերյալ ՎՊ առաջարկների մասին խոսելովՙ Սիմոն Պապյանը հայտնեց, որ բնապահպանության նախարարության տեսանկյունից դա օգտակար նախագիծ է, որն իրագործվում է ճապոնական «Շիմիձու» ընկերության միջոցով: Դրա արդյունքում արտանետվող CH4 գազը պետք է վերածվի էներգիայի, այլ ոչ թե այրվի: Այստեղ վերահսկիչ պալատի արձանագրած խախտումը բնապահպանության նախարարության իրավասություններից դուրս է, քանի որ այդ ծրագրում հայկական կողմի ներկայացուցիչը Երեւանի քաղաքապետարանն է:
