Հուլիսի 1-ից Ռուսաստանում ուժի մեջ մտավ հավատացյալների զգացմունքները վիրավորելու համար պատիժ նախատեսող օրենք: Կպատժվեն «այն հրապարակային գործողությունները, որոնք ակնհայտ քամահրանք են հասարակության հանդեպ եւ կատարվում են կրոնական զգացմունքները վիրավորելու նպատակով»:
Օրենքը նախատեսում է մինչեւ 300 հազար ռուբլի տուգանք, 10 օրվանից մինչեւ 1 տարվա պարտադիր կամ հարկադիր աշխատանքներ կամ 1 տարվա ազատազրկում:
Եկեղեցում նման հանցանք գործելու դեպքում տուգանքը հասնում է մինչեւ կես միլիոն ռուբլու: Պարտադիր աշխատանքների նվազագույն ժամկետը այս դեպքում մինչեւ 20 օր, հարկադիր աշխատանքներինըՙ մինչեւ 3 տարի: Հնարավոր է 3 տարվա բանտարկություն:
Կրոնական գրականության հրապարակային պղծման համար տուգանքը մինչեւ 200 հազար ռուբլի է:
Հունիսի 30-ին նախագահ Վլադիմիր Պուտինի ստորագրած մյուս կարեւոր օրենքը վերաբերում է միասեռականության քարոզչության արգելմանը: Արգելվում է այնպիսի տեղեկատվության տարածումը, որը միտված է «անչափահասների մեջ ոչ ավանդական սեռական կողմնորոշումների ձեւավորմանը»: Օրինախախտները կվճարեն մինչեւ 1 մլն ռուբլի: Պատիժ է նախատեսվում նաեւ օտարերկրացի քարոզիչների համար:
