Սիրիահայության աջակցության ծրագրի համաձայն «Հայաստան» համահայկական հիմնադրամը շարունակում է աջակցել մեր հայրենակիցներին:
«Հայաստան» հիմնադրամից տեղեկացանք, որ իրականացվել են ծրագրեր առողջապահության, կրթության եւ սոցիալական ոլորտներում: 2013թ. հունիսի դրությամբ 100.000 եվրո (Ֆրանսիայի տեղական մարմին), 12.000 եվրո (Գերմանիայի տեղական մարմին), 100.000 դոլար (Լիբանանի տեղական մարմին) ուղղվել են Սիրիայում բնակվող մեր հայրենակիցների տարբեր կարիքներին. գումարի զգալի մասը հատկացվել է Հալեպի հայկական վարժարանների ուսուցիչներին որպես աշխատավարձ: Իսկ Բրազիլիայի, Արգենտինայի, Շվեդիայի տեղական մարմինների հանգանակած գումարներով հիմնադրամը փոխհատուցել է 110 սիրիահայ ուսանողների ուսման վարձը եւ հոգացել սիրիահայերի այլ ծախսեր: ԱՄՆ Արեւմտյան ափի տեղական մարմնի հավաքագրած 10.000 դոլարով նյութական օժանդակություն է ցուցաբերվել Երեւանի Կիլիկյան դպրոցին, որտեղ սովորում են Հայաստան տեղափոխված սիրիահայ երեխաները: Հիշեցնենք, որ գործարարներ Հրայր Հովնանյանի եւ Արա Աբրահամյանի նվիրաբերած միջոցներով հիմնադրամը նաեւ ֆինանսավորել էր Հալեպ-Երեւան-Հալեպ չվերթերը:
