ՀՀ ԱԱԾ քննչական վարչությունում լրտեսության վերաբերյալ քննվող քրեական գործի շրջանակներում իրականացված քննչական եւ օպերատիվ-հետախուզական միջոցառումներով ձերբակալվել է պաշտպանության նախարարության N զորամասի պայմանագրային զինծառայող, Կապան քաղաքի բնակիչ, 1982-ին ծնված Մանե Արտաշեսի Մովսիսյանը: «Ազգ»-ին ԱԱԾ մամուլի կենտրոնից փոխանցեցին, որ ձեռք են բերվել անհերքելի փաստեր, որ նախորդ տարվա հունվարիցՙ մինչ զինծառայության անցնելը, համացանցի միջոցով ծանոթացել է «Odnoklasniki» mail.ru agent, «Facebook» սոցցանցերում «S Dr», «Seryan Dervisyan», «Tigran Dervisyan» պրոֆիլներով հանդես եկող, Թուրքիայի տարածքում գործող Ադրբեջանի հատուկ ծառայությունների աշխատակցի հետ, եւ նամակագրական կապը շարունակվել է նաեւ Մովսիսյանի ՊՆ-ում ծառայության անցնելուց հետո: Առկա տվյալների համաձայնՙ Մովսիսյանն Ադրբեջանի հատուկ ծառայություններին է փոխանցել ծառայության ընթացքում իրեն հասանելի դարձած Հայաստանի վերաբերյալ ռազմական բնույթի պետական եւ ծառայողական գաղտնիք պարունակող տեղեկություններ:
Նմանատիպ հանցագործություն կատարելու համար ԼՂՀ ԱԱԾ-ն ձերբակալել է 2 անձանց, որոնցից մեկը ԼՂՀ ՊԲ զինծառայող է: Նրանք էլ համացանցի միջոցով փոխանցել էին տեղեկություններ վերոնշյալ պրոֆիլներով հանդես եկող Ադրբեջանի հատուկ ծառայությունների աշխատակցին, եւ այժմ ԼՂՀ դատարանում նրանց հանդեպ ընթանում է դատաքննություն:
