ԲՀԿ-ական պատգամավոր Վահե Էնֆիաջյանը երեկ Ազգային ժողովի հայտարարությունների ժամին անդրադարձավ օրերս «օկուպացված տարածքների» դիմաց հայկական կողմից փոխհատուցում պահանջելու վերաբերյալ հայցին (իբր) Միջազգային դատարան, որի վերաբերյալ տեղեկատվությունը դուրս է եկել նախ Ադրբեջանի փոխվարչապետ ոմն Հասանովից: Էնֆիաջյանը նշեց, թե հայկական կողմը սովոր է ադրբեջանական ապատեղեկատվական մեխանիզմների եւ ընդհուպ նախագահ Ալիեւ` կառավարման օղակների տարածած կատարյալ ստերին: Բայց նաեւ` այս միջադեպը ցույց է տալիս, որ ադրբեջանական հակահայկական քարոզչական մեխանիզմը նոր ձեւաչափով է սկսում աշխատել, ու այդ գործընթացը ղեկավարվում է հենց Ալիեւի կողմից:
Ըստ այդ քարոզչության` Հայաստանից ակնկալվող բռնագանձվելիք գումարը նախնական հաշվարկներով 300 միլիարդ դոլար է կազմելու. «Նողկալի գործընթացը դառնում է ավելի գարշելի, երբ Ադրբեջանի փոխվարչապետն արտահայտում է, որ ադրբեջանցին այնքան մեծահոգի էր, որ այս քայլին չէր գնում` սպասելով հայկական կողմիՙ Ղարաբաղյան հարցի շուրջը կոնկրետ գործողություններին»: Էնֆիաջյանն այս համատեքստում է դիտում ադրբեջանական քաղաքականությանը բնորոշ քայլը, երբ նավթային ընկերության նախագահը հայտարարեց, թե պատրաստ է գազ մատակարարել Հայաստանին, եթե վերջինս նման խնդրանքով դիմի Ադրբեջանին:
Կարեւորելով միջազգային մարտահրավերներին արժանի հակահարված տալու եւ դիվանագիտական գրագետ քաղաքականություն վարելու անհրաժեշտությունը` Էնֆիաջյանը հարցրեց. «Արդյոք մեր երկրի արտաքին գերատեսչությունն ադեկվատ քայլե՞ր է ձեռնարկում կասեցնելու եւ միջազգային հարթակում պատասխան տալու ադրբեջանական գործընթացին, թե՞ ինչպես Ռամիլ Սաֆարովի դեպքում եղավ, երբ հայկական կողմն իմացավ արտահանձնման մասին միայն այն ժամանակ, երբ Սաֆարովն արդեն Բաքվում էր: Ինչո՞ւ են խցանված դիվանագիտական խողովակներն ու ովքե՞ր են մեղավոր դրա համար», եզրակացնելով, թե անհրաժեշտ է, որ Հայաստանի Հանրապետության արտաքին գործերի նախարարությունը ժամանակին եւ ճիշտ քայլերով պատասխանի բոլոր այն միջազգային ազդակներին, որոնցից յուրաքանչյուրը կարող է լուրջ վտանգ ներկայացնել մեր երկրի համար»:
