ԱՄՆ ազգային հետախուզության տնօրեն Ջեյմս Կլեպպերը խոստովանել է, որ ամերիկյան հատուկ ծառայությունները համացանցային ընկերությունների միջոցով տեղեկություններ են հավաքում ԱՄՆ-ից դուրս գտնվող օտարերկրացիների վերաբերյալ: Ռոյթեր գործակալությունը մեջբերում է Կլեպպերի այն խոսքը, որ նման գործելակերպը թույլատրելի է ամերիկյան օրենքներով:
Հետախուզության պետը այդպես է մեկնաբանել «Վաշինգտոն փոստ» եւ «Գարդիան» թերթերի հրապարակումները, որոնցում նշվում է, որ ԱՄՆ հատուկ ծառայությունները երկրի քաղաքացիներին հետեւում են համացանցի եւ հեռախոսացանցի միջոցով: Կլեպպերի խոսքերով, թերթերի նյութերը պարունակում են «բազմաթիվ անճշտություններ»:
«Վաշինգտոն փոստը» հունիսի 6-ին գրել էր, որ ԱՄՆ ազգային անվտանգության գործակալությունը եւ ՀԴԲ-ն օգտվում են Microsoft, Yahoo, Google, Facebook, PalTalk, Aol, Skype, YouTube, Apple ընկերությունների սերվերներից եւ այնտեղից իրենց հետաքրքրող ամեն տեսակ տեղեկություններ են ստանում օգտատերերի, ներառյալ նրանց մասնավոր նամակագրության վերաբերյալ:
