ԱՄՆ վարչակազմը հաստատել է Իրանի դեմ ուղղված պատժամիջոցների հերթական փաթեթը: Նպատակն է իրանցիներին ստիպել հրաժարվել միջուկային մշակումներից:
Պատժամիջոցների նոր փաթեթը ուժի մեջ կմտնի հուլիսի 1-ին: Նախագահ Օբամայի ստորագրած հրամանագիրը պատիժներ է նախատեսում հաշվարկների մեջ իրանական ռիալ օգտագործող ֆինանսական կառույցների դեմ: Դրա նպատակն է բանկերին ստիպել հրաժարվել ռիալային ավանդներից: Ի դեպ, ռիալը առաջին անգամ է դառնում պատժամիջոցների թիրախ:
Նախագահական հրամանագիրը պատիժներ է սահմանում նաեւ Իրանի ավտոմոբիլաշինական արդյունաբերության դեմ: Ընկերություններին եւ մասնավոր անձանց արգելվում է համագործակցել իրանական ավտոմոբիլաշինական ֆիրմաների հետ:
Ավելի վաղ համանման պատժամիջոցներ էին ձեռնարկվել Իրանի վառելիքաէներգետիկ ճյուղի, նավաշինական ընկերությունների եւ նավագնացությունների դեմ, հիշեցնում է ԻՏԱՌ-ՏԱՍՍ գործակալությունը:
