«Ապակեմեկուսիչ» ընկերությունը դիմել էր տնտեսական մրցակցության պաշտպանության պետական հանձնաժողովին, հայտնելով, որ «Հայջրմուղկոյուղին» անհիմն կերպով ջրազրկել է իրենց կազմակերպությանը: Ընկերությունը նշել է, որ «Հարավային» մասնաճյուղի «Սեւան» տեղամասի կողմից իրենց ներկայացվել է 2012-ի մայիս ամսվա ջրի ծախսը, որը կազմում է 1272 խմ, այն դեպքում, երբ, սկսած 2005-ից, ընկերության միջին ամսական ծախսը չի գերազանցել 40-50 խմ: Պարզվել է, որ վերոնշյալ խնդիրն առաջացել է ցանցում առաջացած վթարի հետեւանքով: Սակայն, առանց պարզելու վթարի հետեւանքները, «Հայջրմուղկոյուղին» ապամոնտաժել է ընկերությանը պատկանող հաշվիչը, քանի որ վերջինս չի վճարել 1272 խմ ջրի դիմաց:
Հանձնաժողովի ուսումնասիրություններից պարզվել է, որ դադարեցնելով ընկերության ջրամատակարումը, «Հայջրմուղկոյուղին» թույլ է տվել գերիշխող դիրքի չարաշահում: Հանձնաժողովի որոշմամբ «Հայջրմուղկոյուղին» պարտավորվել է տեղադրել նոր հաշվիչ եւ վերականգնել ընկերության ջրամատակարարումը: Ընկերությունը ընդունել է սխալը եւ պարտավորվել սեղմ ժամկետներում լուծել խնդիրը, ինչի պատճառով էլ հանձնաժողովը սահմանափակվեց միայն նախազգուշացում տալով:
