«Զվարթնոց» օդանավակայանի եւ Մուսալեռ գյուղի միջեւ ընկած հատվածում տեղի ունեցավ տարածաշրջանում առաջին դիսկ գոլֆի խաղադաշտի բացման արարողությունը: Կարմիր ժապավենը կտրելու պատիվը տրվել էր Հայաստանում «Իվան դիսկ գոլֆ» ֆեդերացիայի հիմնադիր տնօրեն, բարերար Կայծակ Փալանջյանին եւ ֆեդերացիայի գործադիր տնօրեն Սամվել Ալեքսանյանին:
Միջոցառման ընթացքում նոր մարզաձեւի գիտակ Հայկ Հայրապետյանը ծանոթացրեց խաղի կանոններին եւ էությանը, որից հետո մասնակիցները փորձեցին դիսկերը նետել ցանցի մեջ: Միջոցառման առավել ակտիվ մասնակիցները «Իվան դիսկ գոլֆ» ֆեդերացիայի լոգոտիպով նվերներ ստացան:
Գոլֆ եւ դիսկ գոլֆ մարզաձեւերը նույն խաղային կառուցվածքն ունեն ու խաղացողին նույն զգացողություններն են տալիս: Տարբերությունը միայն մարզագույքի մեջ է: Մահակների եւ գնդակների փոխարեն դիսկ գոլֆ խաղացողները նետում են հատուկ նախատեսված սկավառակներըՙ փորձելով գցել ցանցի մեջ: Դիսկ գոլֆ խաղալը շատ դյուրին է ու հաճելի: Այն աշխարհի ամենամատչելի ու հասանելի մարզաձեւերից է, չունի տարիքային եւ սեռային սահմանափակումներ:
