Մյունխենում կայացած գնդակային հրաձգության աշխարհի գավաթի հերթական փուլի մրցումներին մասնակցեցին 78 երկրների շուրջ 700 հրաձիգներ: Հայաստանից կրակագիծ դուրս եկան 4 հրաձիգներ, որոնք մրցեցին միայն հրացանից հրաձգությունում: Մեր մարզիկները համեստ արդյունքներ գրանցեցին ու չկարողանալով մտնել եզրափակիչ փուլ, ավարտեցին ելույթները:
Առավել հաջող էր Հրաչ Բաբայանի ելույթը, որը օդամղիչ հրացանով 10 մետրից հրաձգությունում վաստակելով 620,1 միավոր, զբաղեցրեց 46-րդ հորիզոնականը: Հայաստանի դրոշի ներքո առաջին անգամ հանդես եկող գերմանացի հրաձիգ Քրիստիան Լաուերը 613 միավորով գրավեց 93-րդ տեղը: Հիշեցնենք, որ Քրիստիանը վերջերս է ամուսնացել հայ հրաձգուհի Իրինա Աղաջանյանի հետ եւ բնակություն է հաստատել Հայաստանում: Նրա կինը 126 մարզուհիների մրցավեճում 410,8 միավորով գրավեց 57-րդ տեղը: Սվետլանա Տիգրանյանը 401,8 միավորով 113-րդն էր:
Մեր հավաքականի հրաձիգները համեստ արդյունքներ են ցույց տվել նաեւ փոքր տրամաչափի հրացանով 50 մետր եւ 3 դիրքից վարժություններումՙ չկարողանալով եզրափակիչի ուղեգիր նվաճել:
