Օրերս Forbes հանրահայտ ամսագիրն անդրադարձել է թուրք-ադրբեջանական հարաբերություններին եւ այդ համատեքստում` ադրբեջանական զինուժի տեխնիկական նոր ձեռքեբերումներին, որոնք, ի տարբերություն բռնապետ Ալիեւի հայտարարությունների, չեն խոսում խաղաղության մասին: Հոդվածը թարգամանաբար ներկայացնում ենք ստորեւ:
«Ադրբեջանը ծրագրում է մոտ ապագայում ընդլայնել իր ռազմաօդային ուժերի արսենալը` հարեւան Թուրքիայից եւ Վրաստանից մատչելի գնումներ կատարելով: Թուրքիան եւ Ադրբեջանը վերջին տարիներին կտրուկ մեծացրել են ռազմական կապերը: Թուրքական զենքի արտահանումը Բաքու վեց անգամ ավելացել է 2020 թվականին` Լեռնային Ղարաբաղի պատերազմին նախորդող ամիսների ընթացքում: Թուրքական արտադրության Bayraktar TB2 անօդաչու թռչող սարքերի արդյունավետ օգտագործումն Ադրբեջանի կողմից հետաքրքրություն է առաջացրել բազմաթիվ երկրների մոտ:
Թուրքիան կարող է Ադրբեջանին ազատորեն մատակարարել նոր ռազմական ինքնաթիռներ եւ ռեակտիվ հրթիռներ, նկատի ունենալով այն, որ Հայաստանը հսկայական գումարներ է ծախսել իր օդուժի արդիականացման համար` Ռուսաստանից գնելով չորս գերժամանակակից Սու-30ՍՄ բազմաֆունկցիոնալ կործանիչներ, որոնք, իդեպ, չեն օգտագործվել անգամ 2020 թվականի հակամարտության ժամանակ` չնայած ամենաառաջադեմ եւ ամենակարող կործանիչներն էին Երեւանի զինանոցում:
Ի հակակշիռ դրան, Ադրբեջանը կարող է գնել ուսումնական ինքնաթիռներ, որոնք կարող են օգտագործվել նաեւ որպես թեթեւ հարձակման ինքնաթիռներ:
Ինչպես հայտնում է Defense News-ը, նոյեմբերին Նիգերը դարձավ առաջին երկիրը, որը գնեց Turkish Aerospace Industries-ի (TAI) Herku ուսումնամարզական ինքնաթիռը: Ինքնաթիռը, որը կարող է 3300 ֆունտ զենք կրել եւ թռիչք կատարել անպատրաստ թռիչքուղիներից, նախատեսված է օդաչուների պատրաստման եւ հետախուզական կամ նույնիսկ թեթեւ գրոհային առաջադրանքների համար:
«Մենք ականատես կլինենք կարեւոր զարգացումների [ինքնաթիռը Ադրբեջան արտահանելու հարցում]: Թուրքիան օգնել է Բաքվին արդիականացնել իր գրոհային ինքնաթիռները, որպեսզի դրանք համատեղելի դարձնի թուրքական եւ տեղական սպառազինությունների, այդ թվում` թուրքական SOM թեւավոր հրթիռի հետ, որի հեռահարությունը մոտ 150 մղոն է»,- դեկտեմբերի 4-ին ասել է Թուրքիայի պաշտպանական արդյունաբերության նախագահության ղեկավար Իսմայիլ Դեմիրը: Հայտարարության հենց հաջորդ օրը Herku -ը փորձնական թռիչքի է տարվել Ադրբեջան:
Բացի հիմնական ուսումնավարժական ինքնաթիռ լինելուց, Herku -ը կարող է նաեւ կրել ընդհանուր նշանակության ռումբեր եւ գործարկել թուրքական արտադրության Smart Micro Munitions (MAM) հրթիռները, նույն սպառազինությունը, որն օգտագործվում է Bayraktar անօդաչու սարքերի համար:
Հունվարին Թուրքիայի կառավարությունը հավանություն է տվել տեղական արտադրության մեկ այլ թեթեւ մարտական/մարզիչ ինքնաթիռի` TAI Herjet-ի սերիական արտադրությանը: Ի տարբերություն Herku -ի, Herjet-ը առաջադեմ ռեակտիվ վարժեցնող է, ինչպիսին է Հարավային Կորեայի T-50 Golden Eagle ինքնաթիռը, որը գրավել է Սեուլի հաճախորդներին` Ինդոնեզիայից մինչեւ Իրաք:
Ներկայացրեց` Գեւորգ ԳՅՈՒԼՈՒՄՅԱՆԸ
