Փետրվարի 3-ին գերմանական տարբեր լրատվամիջոցներ բուռն արձագանքել են արտասահմանի համար գործող «Դոյչե վելլեի» մոսկովյան գրասենյակի փակման, թղթակիցներին հավատարմագրումից զրկելու փաստին: Կրեմլի, Պուտինի վրեժն է,Գերմանիայում Russia Today-ի արգելափակման պատասխանը, գրում են լրատվամիջոցները: «Դոյչե վելլեի» խոսնակը «Շպիգելին» իրազեկել է, թե պաշտոնապես իրենց որեւէ բան դեռ չի ներկայացվել` ո՛չ Բեռլինում, ո՛չ Մոսկվայում»: ՌԴ ԱԳՆ-ն մտադիր է դադարեցնել ՌԴ-ում «ԴՎ»-ի արբանյակային եւ այլ հեռարձակումներ, նաեւ` ընկերությունը որպես «օտարերկրյա գործակալ» ճանաչելու գործընթաց կնախաձեռնի:
Գերմանիայի արտգործնախարար Աննալենա Բերբոքը հունվարին Մոսկվայում կայացած հանդիպման ժամանակ պաշտոնակից Լավրովին իրազեկել էր, թե Գերմանիայում արտոնված չէ պետական հեռարձակողի գործունեությունը, նաեւ ԱՄՆ- ի համար է գործում այս կարգը, եւ այն հիմնավոր է` ելնելով նացիոնալ- սոցիալիզմի պատմական փորձից: Ռուսաստանը քննադատել էր գերմանական RT-ի արգելքը` այն դիտարկելով` որպես կարծիքի եւ մամուլի ազատությունը ոտնահարող փաստ:
