Կալիֆոռնիայում 78 տարեկանում մահացել է կինոյի եւ հեռատեսիլի դերասան Վաչիկ Մանգասարյանը: Իրանում ծնված դերասանը 23 տարեկանում տեղափոխվել է ԱՄՆ եւ մատուցող է աշխատել Լոս Անջելեսում` աստիճանաբար հանդես գալով նաեւ շոու-բիզնեսում: Մանգասարյանն առաջին անգամ նկարահանվել է 1978-ին` «Հարավի շնաձուկը» կինոնկարում: Դերասանը հիմնել է սեփական ռադիոկայանը եւ «Հայկական ազգային ցանց» հեռուստատեսաշոուն, որտեղ հյուրերը քննարկել են քաղաքականությունը, կինոն եւ արվեստը:
Բնութագրական դերերի վարպետ Վաչիկ Մանգասարյանը նկարահանվել է Լարի Էլիքանի «Վերցրու իմ աղջիկներին, խնդրեմ» (1988), Լու Անտոնիոյի «Մութ արձակուրդ» (1989), Ռըզա Ալամեհզադեի «Ասթորիա հյուրանոցի ուրվականները» (1989), Մարթին Լ. Ագիյարի «Լուսնապար» (1992), Ջեք Բենդերի «Ընտանեկան ալբոմ» (1994), Ջոն Մուրլովսկու «Գաղտնի գործակալների ակումբը» (1996), Փոլ Մայքլի «Փողոցային լալկանը» (2003) եւ շատ այլ ֆիլմերում: Նկարահանվել է նա¨ «Աշնան տղան», «Պարզապես մեկ այլ ձկան պատմություն», «Նա գրեց սպանություն», «Առաջին խումբն է գալիս» հեռուստաշարքերի առանձին դրվագներում: Հայերի դերեր է կատարել Ջին Քուինտանոյի «Ինչո՞ւ ես» (1990, Մանսուրյան), Զոե Սմուրի «Ինչ գիտի Անան» (2017, Րաֆֆի) եւ Ռեանդի Քենթի «Հետապնդումը» (2018, Հակոբ) կինոնկարներում, նաեւ «Միս եւ արյուն» հեռուստաշարքի մի դրվագում (1991, Դին Քարթուլյան) եւ հայ-ամերիկյան «Կորած-գտնվածը Հայաստանում» ֆիլմում: Մանգասարյանի վերջին դերը եղավ «Առաջ գնալով» ֆիլմում, որտեղ գլխավոր դերերում հանդես են եկել Լիլի Թոմլինը եւ Ջեյն Ֆոնդան, որոնց հետ լուսանկարները դերասանը տեղադրել է Դիմագրքի իր էջում:
Կյանքի վերջին ամիսներին Վաչիկ Մանգեասարյանը Դիմագրքում տեղադրում էր հումորային տեսագրություններ` ընդդեմ նախագահ Բայդենի եւ քովիդի դեմ պատվաստման, չնայած ինքը պատվաստված էր: Ի դեպ, նրա մահվան պատճառ նշվում է քովիդից առաջացած բարդացումները…
Ա. Բ.
