Գագիկ Ստեփանյանի անվան 135 դպրոցում տեղի ունեցավ «Ստեղծագործական ուղի» խորագրով գեղարվեստաական լուսանկարների ցուցահանդես, որտեղ ներկայացված են Հայկական պետական մանկավարժական համալսարանի Կուլտուրայի ֆակուլտետի Օպերատորության, գեղարվեստական լուսանկարչության ամբիոնի ուսանողների, շրջանավարտների, ինչպես նաեւ 135-րդ դպրոցի աշակերտների աշխատանքները: Ցուցահանդեսը նվիրված է Գ. Ստեփանյան անվան դպրոցի եւ Օպերատորություն, գեղարվեստական լուսանկարչություն ամբիոնի միջեւ կնքված համագործակցության հուշագրի 1-ին տարեդարձին:
Գ. Ստեփանյան անվան 135 դպրոցի տնօրեն Գարեգին Ներսեսյանը հղեց իր ողջույնի խոսքը մասնակիցներին:
Ցուցահանդեսի կազմակերպիչ, վերոհիշյալ ամբիոնի դասախոս Արմեն Ա.Խաչատրյանն իր խոսքի մեջ առաջարկեց զարգացնել երիտասարդների ու պատանիների շրջանակում գեղագիտական ու էսթետիկական մոտեցումը գեղարվեստական լուսանկարչության նկատմամբ, հավելելով, որ լուսանկարչությունը միշտ արդիական է, պետք է լուսանկարելիս էթիկայի նորմերը կարեւորենք, քանի որ յուրաքանչյուրս, ժամանակակից միջոցներից ելնելով, լուսանկարում ենք:
Օպերատորության, գեղարվեստական լուսանկարչության ամբիոնի վարիչ Ռուբեն Երզինկյանը ասաց, որ լուսանկարչությունը առավել պահանջված գեղարվեստական արտահայտչամիջոցներից է, քանի որ հասանելի է լայն շրջանակներին, հատկապես` երիտասարդներին ու պատանիներին:
Ելույթով հանդես եկավ նաեւ ՀՊՄՀ Պատմության եւ հասարակագիտության ֆակուլտետի դեկան Էդգար Հովհաննիսյանը, որը խոսեց ՀՊՄՀ Պատմության եւ հասարակագիտության ֆակուլտետի եւ Օպերատորություն, գեղարվեսական լուսանկարչության ամբիոնի շրջանավարտների եւ ուսանողների` Դանելյան Էմմայի եւ Արամ Խաչատրյանի, ինչպես նաեւ Ա.Ա. Խաչատրյանի համատեղ ջանքերով պատրաստված պաստառի մասին, որը նվիրված է 44-օրյա պատերազմում զոհված այն հերոսներին, որոնք սովորել են Պատմության եւ հասարակագիտության ֆակուլտետում: Պաստառը տեղադրված է ֆակուլտետի` Մեխակ Մեխակյանի անունը կրող լսարանում:
Պարոն Հովհաննիսյանը իր խոսքում մատնանշեց, որ անկրկնելի դեր ունի լուսանկարչությունը պատմական էջերը լուսաբանելու տեսանկյունից: Լուսանկարը խոսուն է ու ներկայացնում է ժամանակն ու եղելությունը: Լուսանկարները թողնում են պատմական հետք` միշտ վառ պահելով հիշողությունը: Այս կապակցությամբ տեղին կլինի հիշել նաեւ Ա.Ա. Խաչատրյանի խոսքերը` «Լուսանկարչությունը կամուրջ է ներկայի եւ անցյալի միջեւ»: Յուրաքանչյուր լուսանկար իր պատմությունն ունի, յուրաքանչյուր լուսանկարի մեջ հեղինակը արտահայտել է իր էմոցիաները, զգացմունքները, միգուցե նաեւ իր թաքնված մտքերն ու երազանքները:
Ինչպես ասել է Դիանա Արբուսը. «Լուսանկարչությունը գաղտնիք է գաղտնիքի մասին: Ինչքան շատ նա պատմի քեզ, այնքան քիչ դու գիտես»: Այսինքն` ինչքան երկար ես նայում լուսանկարին, ավելի ես բացահայտում լուսանկարչի հոգեվիճակը: Հաջողված լուսանկարը լուսանկարչի հոգու հայելին է:
Ցուցահանդեսի ամբողջ ընթացքում մեծ էկրանով ցուցադրվում էր Մանկավարժական համալսարանի եւ դպրոցի համագործակցության ու բուհի պատմությունը ներկայացնող ֆիլմ: Ցուցահանդեսին իրենց երգով մասնակցում էին «Տաթեւեր» երգի-պարի համույթը, ղեկավար՝ Տաթեւ Բարդեղմոսյան:
Ցուցադրված լուսանկարներին եւ մրցույթի արդյունքներին կարելի է ծանոթանալ նաեւ օնլայն տարբերակով, այցելելով` Facebook-յան էջ` Ստեղծագործական ուղի, Instagrm` stexcagorcakan–uxi
Կայքում տեղադրված լուսանկարները թարմացվում են:
ԼԻԼԻԹ ՊԵՏՐՈՍՅԱՆ
