Հանդիպումը մնաց Ուկրաինայի դեմ Ռուսաստանի սանձազերծած պատերազմի ստվերում
Փետրվարի 24-ին Հայաստանի հատուկ ներկայացուցիչ Ռուբեն Ռուբինյանը երկրորդ հանդիպումն անցակացրեց Թուրքիայի ներկայացուցիչ Սերդար Քըլըչի հետ: Թեեւ մոսկովյան առաջին հանդիմանը կողմերը որոշել էին հաջորդ հանդիպումներն անցկացնել Երեւանում եւ Անկարայում միայն եւ դա արձանագրվել էր համատեղ հայտարարության մեջ, բայցեւայնպես որպես հանդիպման վայր ընտրվեց Վիեննան:
Թուրքիայի արտգործնախարարության տվյալներով, հանդիպման վայրի այս ընտրությունը կատարվել է հայկական կողմի պահանջով: Հատկանշական է, որ հունվարի 14-ի առաջին հանդիպումն էլ, ՌԴ արտգործնախարության ներկայացուցիչ Մարիա Զախարովայի խոսքերով, Մոսկվայում էր կայացել հայկական կողմի խնդրանքով:
Ինչպես է բացատրվել հանդիպման վայրի առնչությամբ հայկական կողմի պահանջը թուրքականին, հայտնի չէ. Պարզապես գիտենք, որ մոսկովյան հանդիպումից առաջ ՌԴ արտգործնախարարի օգնական Անդրեյ Ռուդենկոն առանձին հանդիպել էր Սերդար Քըլըչին եւ Ռուբինյանին, իսկ նախքան Վիեննայի հանդիպումը՝ հեռախոսազրույց է ունեցել Ռուբինյանի հետ: Իհարկե հայտնի չէ նաեւ դրա բովանդակությունը: Բայց որ Ռուդենկոյի հանդիպումն ու հեռախոսազրույցը պայմանավորվում են Հայաստան-Թուրքիա նորմալացման գործընթացի նկատմամբ Մոսկվայի շահագրգռություններով, կասկած չի հարուցում:
Համենայն դեպս փետրվարի 24-ին կայացավ նաեւ Վիեննայի հանդիպումը: Քանի որ այդ օրը Ռուսաստանը հարձակվել էր Ուկրաինայի վրա, որն այնուհետեւ վերածվեց Ռուսաստան-Ուկրաինա պատերազմի, հայտնվելով աղջ աշխարհի ուշադրության կենտրոնում, ուստի Ռուբինյան-Քըլըչ երկրորդ հանդիպումը մնաց չհայտարարված այդ պատերազմի ստվերում, մանավանդ որ ՌԴ նախագահ Վլադիմիր Պուտինը ԱՄՆ-ին ու Եվրոպական Միությանը ապառնալուց զատ, շարունակում է վերջիններիս դեմ միջուկային զենք օգտագործելու մտավարժանքները: Թերեւս դա էր պատճառը, որ Վիեննայի հանդիպումն առանձնապես արձագանք չգտավ հայկական լրատվամիջոցներում:
Նույնը, ըստ երեւույթին, կարելի է ասել նաեւ թուրքական լրատվամիջոցների առնչությանբ: Այնուամենայնիվ փետրվարի 24-ին Կ. Պոլսո «Ակօս» շաբաթաթերթն իր կայքէջում «Հատուկ ներկայացուցիչները հանդիպեցին Վիեննայում» վերնագրով ադրադարձել է երկու ներկայացուցիչների հադիպմանը: Ահա թե ինչ է գրել.
<I>«Այսօր Ավստրիայի մայրաքաղաք Վիեննայում երկու երկրների հատուկ ներկայացուցիչներ Սերդար Քըլըչն ու Ռուբեն Ռուբինլանը իրենց երկրորդ հանդիպումն են անցկացրել: Թուրքիայի արտգործնախարարությունը հայտարարեց, որ հանդիպմանը կողմերը կրկնել են Թուրքիայի եւ Հայաստանի հարաբերությունների լիարժեք նորմալացմանն ուղղված բանակցությունները առանց որեւէ նախապայմանի շարունակելու՝ մինչ այդ համաձայնեցված դիրքորոշմանը համապատասխան:
Նախարարության հաղորդագրության մեջ նշվում է, որ այսօր Վիեննայում Հայաստանում Թուրքիայի հատուկ ներկայացուցիչ Սերդար Քըլըչը հանդիպեց Հայաստանի հատուկ ներկայացուցիչ Ռուբեն Ռուբինյանին: Հաղորդագրությամբ միաժանակ նշվել է, որ այս հանդիպմանը որպես վերջնական նպատակ վերահաստատվեց Թուրքիայի եւ Հայաստանի միջեւ հարաբերությունների լիարժեք նորմալացման ապահովումը, որը կողմերի միջեւ ձեռք էր բերվել դեռեւս Մոսկվայում կայացած առաջին հանդիպմանը:
Համանման հայտարարություն տարածվել է նաեւ Հայաստանից, որտեղ մասնավորապես նշվում է. «Երկու երկրների հատուկ ներկայացուցիչները, ինչպես որոշվել էր մոսկովյան առաջին հանդիպմանը, վերահաստատեցին, որ բանակցությունների վերջնական նպատակը Հայաստանի եւ Թուրքիայի միջեւ լիարժեք նորմալացման ապահովումն է: Այդ նպատակով նախատեսվող փոխադարձ կոնկրետ քայլերի շուրջ ներկայացուցիչները մտքեր են փոխանակել եւ կրկնել են գործընթացն առանց նախապայմանի շարունակելու իրենց պատրաստակամությունը»:
ՀԱԿՈԲ ՉԱՔՐՅԱՆ
Թուրքագետ
