Թեքեյան կենտրոնի ցուցասրահում բացվեց «Վահան Թեքեյան» ամենամյա մրցանակաբաշխության «Կերպարվեստ» եւ «Դեկորատիվ-կիրառական արվեստ» անվանակարգերում ներկայացված աշխատանքների ցուցադրությունը:
«Վահան Թեքեյան» ամենամյա մրցանակաբաշխությունն անցկացվում է 30-րդ անգամ՝ «Ագապի Շաքե Ղազարյան» հիմնադրամի հովանավորությամբ:
Միջազգային մրցութին մասնակցելու հայտ էր ներկայացրել շուրջ քսանհինգ հեղինակ. նրանց թվում էին ինչպես արվեստասերներին հայտնի, այնպես էլ ոլորտի նորահայտ անուններ: Ցուցադրության բացմանը ներկա էին մրցույթի մասնակիցները, ուսանողներ, մշակութասեր հանրություն:
ՀԹՄՄ Կենտրոնական վարչության անդամ, արվեստագիտության դոկտոր Արա Հակոբյանը ողջունեց ներկաներին եւ շնորհավորեց մասնակիցներին: Նա ղեկավարում է «Կերպարվեստ» եւ «Դեկորատիվ-կիրառական արվեստ» անվանակարգերի հանձնաժողովները, ինչպես նաեւ «Վահան Թեքեյան» մրցանակակիր է:
Նա ուրախալի համարեց ստեղծագործողների ակտիվ մասնակցությունը մրցույթին, որը առիթ է տալիս մտածել մրցութային ցուցադրությունը առավել մեծ ցուցասրահում կազմակերպելու մասին. «Հանձնաժողովը դժվար է ընտրության առջեւ է: Ներկայացված են ակադեմիական, ավանդական եւ վերացական արվեստի գործեր»,-հավելեց Արա Հակոբյանը:
Նա կարեւորեց մրցույթին մասնակցությունը, որին տարիների ընթացքում մասնակցել եւ մրցանակների են արժանացել անվանի գեղանկարիչներ, իսկ մրցանակաբաշխությունը դարձել է մշակութային սպասված ձեռնարկ ստեղծագործողների եւ արվեստասերների համար: Արա Հակոբյանն ընդգծեց նաեւ «Դեկորատիվ-կիրառական արվեստ» անվանակարգի կարեւորությունը, որը պահպանում է ազգային մշակույթի նկարագիրը, իսկ ստեղծագործությունների՝ շարքով ներկայանալու հանգամանքը վկայում է արվեստագետների բովանդակային մտածելակերպի, ստեղծագործական մտքի եւ գաղափարի մասին:
ՔՐԻՍՏԻՆԵ ՄԵԼՔՈՆՅԱՆ
Հայաստանի Թեքեյան մշակութային միության լրատվական կենտրոն
