Երեւանի քաղաքապետարանը տրանսպորտային ցանցի «հզո՜ր» բարեփոխման շրջանակում որոշել է եւս մեկ քայլով հեշտացնել կանգառներում անվերջ սպասող բնակիչների կյանքը: Քաղաքային իշխանությունն ընտրություններից հինգ պակաս պայմանագիր է կնքել «Յանդեքս» ընկերության հետ ու առցանց ծրագիր պատվիրակել, ըստ որի՝ բավական է սմարթֆոնից մուտք գործել հավելված, ցուցիչով նշել այն կանգառը, որտեղ սպասում եք, եւ կերեւա՝ ի՞նչպես եւ ո՞ր ուղղությամբ են շարժվում ցանցին միացած ավտոբուսները:
«Ազգ»-ի թղթակիցը փոքր թեստ ու քաղաքացիների շրջանում հարցում անցկացրեց՝ պարզելու՝ ինչպես է աշխատում ծրագիրը: Ծրագիրն իրականում աշխատում է անխափան, հարցն այն է, որ առցանց քարտեզի վրա երեւացող ավտոբուսները հիմնականում ուշ են տեղ հասնում: Թեեւ ծրագիրը թարմացվում է 30 վայրկյանը մեկ, բայց քաղաքապետարանը գերմանական ճշգրտություն ապահովել չի կարողացել:
Մոտ 30 քաղաքացուց հետաքրքրվեցինք՝ տեղյա՞կ են արդյոք նորամուծությունից ու փորձե՞լ են օգտվել դրանից: Հարցվածները հիմնականում տեղյակ էին, անտեղյակ էին այն մարդիկ, որ սմարթֆոն չունեին:Բայց հարցվածներից որեւէ մեկն առցանց ծրագրից չէր օգտվել եւ անգամ չէր էլ մտածել՝ գործնականում ու առցանց քարտեզի վրա տեսնել, թե ավտոբուսն ո՞ւր է հասել:
Նորամուծությունն իհարկե լավ է, հուսանք այն կարդարացնի իրեն, եւ առայժմ 7 ցանցի փոխարեն, որ միացված են ցանցին, առաջիկայում տրանսպորտային ամբողջ համակարգը կներառվի դրա մեջ: Տարակուսելի է երկու բան՝ ինչո՞ւ է ընտրվել հենց «Յանդեքսը» ու առցանց ծրագրի համար առանձին հավելված չի մշակվել եւ ինչո՞ւ է քաղաքային իշխանությունը հենց ընտրությունների նախաշեմին որոշել բարեփոխել տրանսպորտային ցանցը:
ՍԵՎԱԿ ՎԱՐԴՈՒՄՅԱՆ
