2025 թվականի մարտի 5-6-ը Մոսկվայում տեղի ունեցավ երկրի ամենամեծ կրթական ֆորումը՝ Կրթության XII միջազգային տոնավաճառը MMSO.EXPO-2025:
Ցուցահանդեսի կազմակերպիչներ՝ Ռուսաստանի Դաշնության գիտության եւ բարձրագույն կրթության նախարարություն, Ռուսաստանի Դաշնության կրթության նախարարություն: 2025 թվականին ցուցահանդեսի տաղավար է այցելել ավելի քան 15 հազար հյուր, ցուցահանդեսում ավելի քան 200 ցուցադրող ներկայացրել են իրենց նոր գաղափարները՝ ժամանակակից կրթական տեխնոլոգիաներ, ենթակառուցվածքներ եւ ինտելեկտուալ լուծումներ: Աշխատանքային 2 օրվա ընթացքում ցուցահանդեսի տաղավարներ են այցելել կրթական եւ արդյունաբերական բիզնեսի բոլոր մակարդակների ներկայացուցիչներ՝ կրթական կազմակերպությունների ներկայացուցիչներ, ուսուցիչներ, ուսանողներ: Սրահի ծավալուն ծրագրի շրջանակներում անցկացվել են մի շարք նիստեր, որոնցում քննարկվել են ժամանակակից կրթության արդիական հարցեր, այդ թվում՝ կրթության համաժամացումը արտադրության հետ՝ ապագայում երկրի տնտեսության զարգացման համար:
2025թ. Բելառուսի մայրաքաղաք Մինսկում մարտի 12-16 տեղի ունեցավ XXII գրքի միջազգային ցուցահանդեսը: Ցուցահանդեսի նպատակն էր բելառուսական եւ մասնակից այլ երկրների կրթական եւ գիտական կազմակերպություններին, գիտական ու կրթական ապրանքներ եւ ծառայություններ արտադրողներին, ինչպես նաեւ մասնագիտացված լրատվամիջոցներին տեղեկացնել հիմնարար եւ կիրառական գիտության ձեռքբերումների մասին:
Հաշվի առնելով հայտնի գիտնական, Հայկական էներգետիկական ակադեմիայի հիմնադիր նախագահ, Ռուսաստանի բնագիտության ակադեմիայի պրոֆեսոր, «Ազգ»-ի երկարամյա աշխատակից Ստեփան Պապիկյանի կատարած գիտական աշխատանքների արդիականությունը, գիտական ու մանկավարժական մեծ փորձը, նրա աշխատությունների ամփոփագրերը ներառվել են Մինսկում եւ Մոսկվայում գրքերի միջազգային հեղինակավոր ցուցահանդեսի կատալոգներում:
Հարկ է նշել,որ Ս.Պապիկյանը հեղինակ է շուրջ 300 գիտական աշխատությունների եւ բազմաթիվ մենագրությունների: Նրա գիտական աշխատանքները դեռեւս Խորհրդային Միության տարիներին ներդրվել են Մոսկվայի էներգահամակարգում եւ բազմաթիվ կազմակերպություններում: Նա միջազգային ճանաչման արժանացած վաստակաշատ գիտնական է:
Նրա կողմից մշակվել են ջերմամատակարարման համակարգերի ռեժիմների ուսումնասիրության մի շարք արժեքավոր մեթոդներ, որոնք հնավորություն են տալիս լուծելու բազմաթիվ խնդիրներ՝ հաշվի առնելով ելակետային տվյալների անորոշությունը եւ ռեժիմային հարցեր: Մասնավորապես, հիմնավորել է ռեժիմների վերլուծության միջակայքային մեթոդը, որը զգալիորեն հեշտացնում է իրականացնել ինժեներական հաշվարկները, հատկապես շուկայական հարաբերությունների պայմաններում: Նրա գրչին են պատկանում նաեւ Հայաստանի էներգետիկայի պատմության քառհատոր արժեքավոր գիտական մենագրությունները:
Ս. Պապիկյանի էներգետիկայի բնագավառին նվիրված ուսումնա-սիրություններն աչքի են ընկնում պրոֆեսիոնալ բարձր մակարդակով,ուսում-նասիրվող նյութի քաջ իմացությամբ: Դրանք առանձնանում են քննարկվող առարկայի հանդեպ թարմ եւ ինքնատիպ մոտեցումներով:Արցախի Հանրապետության էներգետիկայի զարգացման գործում ունեցած ակնառու ներդրման համար 2017 թվականին ԱՀ նախագահի կողմից Ստ. Պապիկյանը պարգեւատրվել է Արցախի Հանրապետության պետական պարգեւով` «Երախտագիտություն» մեդալով:
