«Էլեկտրան հասարակության խորխորատներից» (Electre des bas-fonde) պիեսի հերթական բեմադրության ավարտին հանդիսատեսը դարձյալ բուռն ծափահարություններով եւ ոգեւորությամբ է արձագանքել դերասանների հավաքական խոնարհումին», գրում է Փարիզից Մելանի Թույսուզյանը «Միրոր-Սփեքթեյթր» շաբաթաթերթում: Սիմոն Աբգարյանը զգացմունքային երաժշտությամբ եւ բալետային կրակոտ կատարումներով կարողացել է իր բեմադրությամբ արդիական շունչ հաղորդել Էսքիլիսի մ.թ. առաջ գրած «Օրեսթես» հունական ողբերգությանը, որ պատմում է, թե ինչպես Ագամեմնոնի զավակները` Օրեսթեսն ու Էլեկտրան վրեժխնդրությունից դրդված սպանում են իրենց մորը` Կլիմնեստրային, որն իր սիրեկանի համագործակցությամբ դավադրաբար սպանել էր ամուսնուն` Ագամեմնոնին: Պիեսը, շարունակում է Թույսուզյանը, որտեղ պարային տեսարաններում հանդես է գալիս նաեւ մեկ ալ հայազգի դերասանուհի` Շուշան Ագուջյանը, 2019-ին է առաջին անգամ բեմադրվել եւ հաջորդ տարի իսկ արժանացել ֆրանսիական հեղինակավոր «Մուլիեր» մրցանակին` երեք անվանակարգերում: Դրանից առաջ` 2001-ին Սիմոն Աբգարյանը ստացել էր իր առաջին մրցանակը որպես լավագույն դերասան «Գազանը լուսնի վրա» ֆիլմում իր դերակատարման համար:
Նրա կարիերան, սակայն, սկսել էր ավելի վաղ` Լոս Անջելեսում: Ֆրանսիայում ծնված Աբգարյանի լիբանանահայ ծնողները որոշում են Լիբանան վերադառնալ նախքան 1975-ի պատերազմը: Բայց տեղի պատերազմը ստիպում է նրանց վերադառնալ նախ Ֆրանսիա եւ ապա անցնել օվկիանոսը եւ հաստատվել Լոս Անջելեսում:
Հրեշտակների այդ քաղաքում է, որ Աբգարյանը առաջին անգամ բացահայտել է թատրոնի աշխարհը` միանալով Ժիրայր Փափազյանի ղեկավարած թատերախմբին: Այնուհետեւ Ֆրանսիա վերադառնալով դերասան Ժորժ Բիջոյի հորդորներով նա «Թեատր դյու Սոլեյի» դերասանական կազմին է միանում եւ աշխատակցում մի շարք հեղինակավոր բեմադրիչների հետ, որոնցից հատկապես Արիան Մնուշկինը նրան սովորեցրել է ամեն ինչ բեմարվեստի մասին: Բեմում առաջին հաջողությունները նրան առաջնորդել են կինոաշխարհ, որտեղ աշխատել է տարբեր ռեժիսորների` Սեդրիկ Քլապիշի, Ռոբեր Կետիկյանի, Ատոմ Էգոյանի հետ: Աբգարյանը տաղանդավոր է եւ կարող է մարմնավորել տարբեր կերպարներ, գնդապետ` «Քաբուլյան խոհանոց» ֆիլմում, հայ նպարավաճառ` «Հանցագործ բանակը» ֆիլմում եւ կորսիկացի մաֆիոզ` «Էդմոնդ» ֆիլմում: 2016-ին նա արժանացել է ֆրանսիական կինոյի բարձրագույն պարգեւանշանին Կետիկյանի «Խելահեղ պատմություն» (Une histoire de Fou) ֆիլմում իր դերակատարման համար: Ֆիլմը Հայոց ցեղասպանության թողած հետեւանքների մասին է: Բայց Աբգարյանը ավելի հայտնի է 2009-ին էկրան բարձրացած Կետիկյանի մեկ այլ` «Հանցագործ բանակը» (L Arme՛e du crime») կինոնկարում մարմնավորած Միսաք Մանուշյանի իր դերակատարումով: Ֆիլմը ներբողում է հերոսական կյանքը 1944-ին նացիստների կողմից Փարիզի գրավման ժամանակ Մանուշյանի դիմադրության շարժման անդամների, որոնք Ֆրանսիայի պատմության մեջ կարեւոր դեր են խաղացել: «Այդ մարդկանց կատարածը արտասովոր խիզախություն էր: Հպարտ եմ, որ այդ դերը կատարել եմ», խոստովանել էր Աբգարյանը «Ալոսինե» ֆրանսիական կինոյի կայքին տված իր հարցազրույցի ժամանակ:
2020-ին ղարաբաղյան երկրորդ պատերազմի օրերին նա այնքան էր ազդվել, որ որոշել էր իր ձայնը լսելի դարձնել «Le Figaro» հանրահայտ թերթում` հոդված գրելով ի պաշտպանություն Արցախի եւ ընդդեմ թուրք-ադրբեջանական ռասիզմի: Նա այժմ ամենահամբավավոր դերասաններից է Ֆրանսիայում եւ ղեկավարում է «Tera» թատերախումբը` բեմադրելու համար իր պիեսները:
Պատրաստեց` ՀԱԿՈԲ ԾՈՒԼԻԿՅԱՆԸ
