Սեւանա լճի պահպանության եւ կենդանական աշխարհի հետագա բազմացման համար մեծ ծավալի գիտական ուսումնասիրություններ են կատարում ՀՀ ԳԱԱ Կենդանաբանության եւ հիդրոէկոլոգիայի գիտական կենտրոնի աշխատակիցները:
Մասնավորապես, իրականացվել են Սեւանա լճի ձկան եւ խեցգետնի պաշարների գնահատման աշխատանքներ: Հիմնավորվել է, որ 2020թ. խեցգետնի ընդհանուր զանգվածը լճում մոտ 105 տ էր: Պոպուլյացիայի վիճակը տարեցտարի վատանում է, արդյունագործական պաշարները խզված են: Անկառավարելի որսի եւ հիվանդությունների հետեւանքով տեսակը կանգնած է ոչնչացման եզրին:
Լճի խեցգետնի արդյունավետությունը վերականգնելու նպատակով առաջարկվել է արգելել խեցգետնի որսը, վաճառքը երկրի ներսում եւ արտահանումը երկրի սահմաններից դուրս: Պայքարել որսագողության դեմ: Դիտվել է նաեւ սիգի ընդհանուր պաշարների նվազում. 2020թ. սիգի արդյունագործական պաշարը կազմել է 586տ, նախորդ տարվա 667տ փոխարեն, իսկ ընդհանուր պաշարը՝ 2345տ, 2668տ փոխարեն (ղեկ` կ.գ.դ. Բ. Գաբրիելյան):
Ստեփան ՊԱՊԻԿՅԱՆ
