«Սակավաջրություն էր, ջրամբարների ջուրը խնայողաբար օգատգործեիք». Փաշինյանը դեմ էր Սեւանից հավեյալ ջրառին

Վարչապետը Սեւանից հավելյալ ջրառ անելուն, իհարկե, այժմ դեմ չէ, նախագիծը խորհրդարան իր թիմն էր բերել, իր թիմն էլ վավերացրեց այն: ՔՊ-ական պատգամավորները, ընդդիմադիրների հարցերին ու քննադատությանն ի պատասխան, թե Սեւանին չպետք այդքան խեղճացնենք, արձագանքում էին՝ լավ օրից չէ, որ հավելյալ ջուր ենք վերցնում: «Տարին սակավաջուր է եղել, ջրամբարները թերլցած էին,- ներկայացնում էր տարածքային կառավարման ու ենթակառուցվածքների փոխնախարար Վաչե Տերտերյանը: Բայց տարիների կենսափորձով փոխնախարարը պետք է հիշի գոնե, որ 2012-ին, երբ խորհրդարանը նորից քննարկում էր Սեւանից հավելյալ ջրառ իրականացնելու հարցը, ընդդիմադիր պատգամավոր Փաշինյանն այդ առնչությամբ ինչ էր ասում: «-Պրն Անդրեասյան (Ջրային կոմիտեի այն ժամանակվա նախագահ Անդրանիկ Ավետիսյանին է դիմում-Ս.Վ.) դուք ձեր խոսքում օգտագործեցիք «սակավաջրություն» արտահայտությունը: Խնդիրն այն է, որ ՀՀ ջրային օրենսգրքում կա հոդված 92, որտեղ խոսվում է սակավաջրության եւ երաշտի մասին, թե կառավարությունն ի՞նչ որոշումներ պետք է կայացնի սակավաջրության եւ երաշտի պարագայում: Տրամաբանությունն այն է, որ եթե կա սակավաջրության վտանգ, կառավարությունը պետք է հատուկ միջոցներ ձեռնարկի ջրի խնայողության ռեժիմի օգտագործման համար: Այսինքն՝ եթե ապրիլին պարզ է, որ սակավաջրություն լինի, կառավարությունը պետք է միջոցներ ձեռնարկի, որպեսզի ձեր ասած նույն Ազատի, Ախուրյանի ջրամբարների, Ապարանի ջրերը խնայողաբար օգտագործվեն: 2-րդը՝ «Սեւանա լճի մասին» օրենքի 11-րդ հոդվածում ասվում է, որ օրենքի եւ ընդհանրապես ՀՀ կառավարության քաղաքականությունը պետք է լինի Սեւանա լճի բացասական հաշվեկռշի բացառումը: Սա նշանակում է, որ Սեւանից պետք է բաց չթողնվի այնքան ջուր, որքան տվյալ դեպքում մուտք է գործել: Այսինքն՝ տրամաբանությունը հետեւյալն է, ու քանի որ դուք օրենքում նաեւ այդ հոդվածում եք փոփոխություն առաջարկել, ստացվում է, որ տվյալ դեպքում մենք գործ ունենք ոչ միայն Սեւանա լճից ջուր բաց թողնելու խնդրի, այլեւ բացասական հաշվեկշիռ ապահովելու հետ: Ստացվել է, որ ձեր առաջարկի մեջ չե՞ք կարծում, որ աբսուրդ կա, որովհետեւ ստացվում է ձեր առաջարկով օրենքի հոդվածը հետեւյալ տրամաբանությամբ՝ Սեւանա լճի ջրային բացասական հաշվեկշռի բացառումը բացառությամբ օրենքով նախատեսված դեպքերի: Եթե օրենքը նախատեսել է, որ բացասական հաշվեկշիռը բացառվի, էլ ի՞նչ է նշանակում՝ բացառությամբ օրենքով նախատեսված դեպքերի»:

Ընդդիմադիր Փաշինյանի քննադատությունը, իհարկե, տեղին էր: Սեւանի ջրերը պետք է խնայողաբար օգտագործել, հոգ տանել ՀՀ քաղցրահամ ջրի ամենամեծ պաշարի մասին: Բայց անհասկանալի է արդեն վարչապետ Փաշինյանի՝ նույն հարցի վերաբերյալ 180 աստիճանով շրջված մոտեցումը:

ՍԵՎԱԿ ՎԱՐԴՈՒՄՅԱՆ