2017-ից սկսած գեղարվեստական մի շարք ֆիլմերի համատեղ արտադրության փորձ ունեցող ռեժիսորներ Ֆաբիեն Մարսոն եւ Մեդհի Իդիրը վերջերս սկսել են Շառլ Ազնավուրի մասին պատմող կենսագրական ֆիլմի նկարահանումները, տեղեկացնում է Փարիզից «Ազգ»ի թղթակից Ժան Էսքիյանը: Նկարահանումների ծրագրին ծանոթ էր աշխարհահռչակ շանսոնյեն, որն իր հավանությունն էր տվել իր փեսային՝ դստեր Կատիայի ամուսնուն՝ պրոդյուսեր Ժան-Ռաշիդ Կալուշին:
Ֆիլմում Շառլ Ազնավուրի դերը կատարում է Թահար Ռահիմը, որ դրանից առաջ հայազգի Նազարեթ Մանուկյանի դերն էր ստանձնել ռեժիսոր Ֆաթիհ Աքընի «Սպին» (2014) ֆիլմում:
Նկարահանումները կատարվում են Փարիզում, Փարիզի արվարձաններում եւ Նորմանդիում:
Տեսարաններից մեկում Շառլի մոր՝ տիկին Քնարիկի հուղարկավորությունն է Ժան Գուժոն փողոցում գտնվող հայկական եկեղեցում (1966 թ. հոկտեմբերի 1-ին): «Ես ներկա եմ եղել այդ արարողությանը հայրիկիս հետ, որ Քնարիկ մայրիկի հետ հանդես էր եկել հայկական թատերական ներկայացումներում: Վստահաբար հուզմունքով վերապրելու եմ այդ պահը՝ դիտելով ֆիլմի այդ կադրերը», գրում է Էսքիյանը: Քնարիկի դերը ֆիլմում մարմնավորում է Նարինե Գրիգորյանը, Շառլի հոր՝ Միշա Ազնավուրյանի դերը՝ Հովնաթան Ավետիքյանը: Մյուս դերերում զբաղված են Մարի-Ժյուլի Բոպը (Էդիթ Պիաֆ), Բաստիեն Բուիյոնը, Լիոնել Սեսիլիոն եւ Տիգրան Մխիթարյանը: Ֆիլմը, որը նախատեսված է թողարկել 2024-ի աշնանը (նշելու համար Շահնուր Վաղինակ Ազնավուրյանի ծննդյան հարյուրամյակը) ընդհանուր առմամբ ընդգրկելու է ֆրանսիական շանսոնի անգերազանցելի աստղի կենսագրության 1950-ից 2014 տարիները: Սպասենք:
Թարգմ. Հ. ԾՈՒԼԻԿՅԱՆ
(The Armenian Mirror-Spectator)
