Երեկ լրացավ Արցախյան շարժման 37-րդ տարին, որը հայ ժողովրդի պատմության մեջ դարձավ հայրենասիրության, միասնության եւ աննկուն կամքի խորհրդանիշ: Ղարաբաղյան շարժումը չէր սահմանափակվում միայն պահանջներով. այն դարձավ ազատության, արդարության եւ ինքնորոշման համար մղվող պայքարի սկիզբ: Հայ ժողովուրդը ցույց տվեց, որ միասնականության պայմաններում ոչ մի ճնշում, ոչ մի բռնություն չի կարող կոտրել մեր ազգային ինքնությունը: Այսօր, երբ Արցախը ժամանակավորապես բռնազավթված է, իսկ հայ ժողովրդի առջեւ կանգնած են նոր ու ծանրագույն մարտահրավերներ, փետրվարի 20-ի պատգամը մեզ հուշում է, որ պայքարը երբեք չի ավարտվում, քանի դեռ արդարությունը չի վերականգնվել: Փետրվարի 20-ը հիշեցնում է, որ Արցախը սոսկ հող կամ պատմություն չէ, այլ՝ հայության ոգին, ինքնությունն ու իրականության անբաժանելի մասը: Ղարաբաղյան շարժումը ոչ թե անցյալի մի էջ է, այլ նոր սերունդների պայքարի շարունակական ուղեցույց: Այսօրվա պայքարը նաեւ հարգանքի տուրք է բոլոր նահատակներին, ովքեր իրենց կյանքը զոհեցին հանուն Արցախի, Մայր Հայաստանի, Հայոց պետականության եւ մեր ժողովրդի ապագայի: Փետրվարի 20-ը մեզ պարտավորեցնում է միավորվել, ուժեղանալ եւ շարունակել պայքարը հանուն Արցախի, արդարության եւ ազգային արժեքների ու արժանապատվության պաշտպանության:
«Հանուն Արցախի» Միավորում
Երեւան, 20 փետր. 2025
