ՀՀ Գիտությունների ազգային ակադեմիայի Ֆիզիկայի կիրառական պրոբլեմների ինստիտուտում հետազոտվել է միաբյուրեղական թիթեղից դիֆրակցված ռենտգենյան ճառագայթների վարքը՝ փոխուղղահայաց ուղղություններով ձայնային ալիքների առկայությամբ:
Հետազոտություններն իրականացվել են առանց ակուստիկ ալիքների եւ ըստ հաստության, ըստ երկարության ու միաժամանակյա փոխուղղահայաց (օրթոգոնալ) ուղղություններով ակուստիկ ալիքների առկայության պայմաններում: Կատարված հետազոտությունների ընթացքում ստացված արդյունքները կարող են օգտագործվել ռենտգենյան եւ սինքրոտրոնային փնջերի բնութագրերի արդյունավետ ղեկավարման մեթոդների ու բարձր ճշգրտությամբ ռենտգենակուստիկական տարրերի մշակման համար, որոնք թույլ կտան իրականացնել ռենտգենյան փնջերի սպեկտրի, ինտեսիվության, ֆոկուսային հեռավորության եւ անկյունային դիրքի միաժամանակյա կառավարում՝ ապահովելով ժամանակային 0.1մկվ կարգի լուծողունակություն:
Հարկ է նշել, որ հետազոտության արդյունքները հետաքրքրություն են առաջացրել ՌԴ Կուրչատովյան ինստիտուտում: Պայմանավորվածություն է ձեռք բերվել հետազոտությունները շարունակելու եւ ռենտգենյան փնջերի պարամետրերի արագ կարգավորման սարք մշակելու վերաբերյալ:
Հետազոտության արդյունքները տպագրվել են հեղինակավոր գիտական հանդեսներում:
Կատարված հետազոտությունների արդյունքները զեկուցվել եւ ակտիվորեն քննարկվել են Իտալիայի Միջուկային ֆիզիկայի ազգային ինստիտուտի «Ֆրասկատիի ազգային լաբորատորիաներ»-ի, Տոմսկի պոլիտեխնիկական համալսարանի, ՀՀ ԳԱԱ Ֆիզիկայի կիրառական պրոբլեմների ինստիտուտի կողմից պարբերաբար կազմակերպվող միջազգային գիտաժողովներում եւ սեմինարներում:
ՍՏԵՓԱՆ ՊԱՊԻԿՅԱՆ
