«ԳԴՀ կանցլեր Մերցը ZDF-ին տված հարցազրույցում ասել էր, թե «մեծ հարգանք է տածում Իսրայելի բանակի, ղեկավարության հանդեպ, որ քաջություն ունեցավ դա անելու»: Իսրայելն արեւմտյան դաշնակիցների համար «կեղտոտ գործն» (die Drecksarbeit) արել է, ասել էր Մերցը՝ Իրանի դեմ հարձակման մասին, որ մեծ քննադատության է արժանացել, այդ թվում՝ կոալիցիայի մաս ՍԴԿ-ից: Երեւի նաեւ քննադատության աճն է առիթ տվել, որ Իսրայելի ինքնապաշտպանության իրավունքը գերադաս համարող ԱԳ նախարար Վադեֆուլը ռազմական գործողությունների ընթացքը մեղմելու առաջարկ անի: Նա Բեռլինում Հորդանանի իր պաշտոնակցի հետ հանդիպմանը նշել է, թե իր առաջարկով ուրբաթ՝ այսօր, Ժնեւում Ֆրանսիայի եւ Մեծ Բրիտանիայի իր պաշտոնակիցները եւ ԵՄ արտաքին հարաբերությունների հանձնակատար Կալլասը ուղիղ բանակցություն կվարեն Իրանի ԱԳ նախարար Արախչիի հետ, նշում է dpa-ն՝ փոխանցելով Վադեֆուլի ուղերձը՝ «Երբեք ուշ չէ բանակցությունների համար, երբ ազնիվ մղումներ ունես»:
ԱՆԱՀԻՏ ՀՈՎՍԵՓՅԱՆ
Գերմանիա
Լուսանկարը՝ Դոյչլանդֆունկի
